Pasi hyri zyrtarisht në listën e miliarderëve të botës nga revista Forbes, biznesmeni shqiptar Samir Mane rrëfen se bëri 3 telefonata.
Në një intervistë me gazetarin Blendi Fevziu për emisionin Opinion në Tv Klan, Samir Mane tregoi se telefonatën e parë për t’i dhënë lajmin ishte familja e tij, e veçanërisht i biri Martini.
Telefonata e dytë ishte stafi i kompanive të tij.
Ndërsa telefonata e tretë ishte me një person në Austri.
Blendi Fevziu: Kush ishte personi i parë të cilit ia dhe lajmin?
Samir Mane: Personi i parë ishte familja, nga ata Martini padyshim. Mora natyrisht përgëzimet e tyre të mëdha për faktin që më kanë ndihmuar maksimalisht të arrij këtu ku jam.
Blendi Fevziu: Po persona të tjerë ju kontaktuan? Ju uruan?
Samir Mane: Më uruan plot persona të tjerë, telefonata e dytë ishte me stafin dhe telefonata e tretë ishte me një njeri që më ka ndihmuar atëherë kur unë nuk kisha para në Austri.
Blendi Fevziu: Austriak apo shqiptar?
Samir Mane: I huaj, të cilit i thashë të falenderoj që dikur më ke dhënë televizorë pa lekë, ke krijuar besimin që m’i dhe pa lekë dhe unë t’i shes në Shqipëri, dhe tani unë jam këtu ku jam.
Blendi Fevziu: Në çfarë rrethanash ka ndodhur kjo histori?
Samir Mane: Kjo ishte në fillim të viteve ’90-’91 kur unë blija 10 televizorë, ai më thoshte merr 20 dhe m’i sill lekët.
Blendi Fevziu: Me raport besimi vetëm?
Samir Mane: Me besim, mund t’i kisha marrë ato lekë, por po t’i kisha marrë ndoshta s’do isha dhe këtu. Pastaj kur blija 100 më thoshte merr dhe 200 të tjera shiti, pastaj kur merrja 1000 thoshte merr dhe 2000 të tjera shiti. Dhe unë gjithmonë ia ktheja. Atë njeri e falenderova. Me mua është treguar shumë korrekt dhe i mbaj akoma marrëdhëniet.
Blendi Fevziu: Këto kanë qenë fillesat e pasurisë tënde?
Samir Mane: Në masë të madhe po. Kur fillova të fitoja para, këto ishin një ndihmë e madhe.
