Gjykata e Posaçme e Shkallës së Parë ka revokuar masën e sigurimit për Kreshnik Farrukun (Budllën) i akuzuar për trafik narkotikësh jashtë vendit.
Farruku ishte ankuar për faktin se nuk ka përdorur Sky ECC dhe nga letërporositë që kanë ardhur nga Italia dyshohet se atë kod në celularin e enkriptuar e ka përdorur i vëllai i tij.
Siç mësoi gazetarja Glidona Daci, revokimi i masës “arrest në burg” është kërkuar edhe nga vetë prokuroria pas administrimit të letërporosisë nga Italia. Nga provat provohej se PIN-i i përkiste vëllait të Kreshnik Farrukut.
“Gjykata e Posaçme e Shkallës së Parë për Korrupsionin dhe Krimin e Organizuar vendosi:
1. Pranimin e kërkesës së kërkuesit Kreshnik Budlla (Farruku).
2. Revokimin e masës së sigurimit “arrest në burg”, parashikuar nga neni 238 i Kodit të Procedurës Penale, caktuar ndaj personit nën hetim Kreshnik Budlla (Farruku), me vendimin Nr. 1, datë 11.01.2025, të Gjykatës së së Posaçme të Shkallës së Parë për Korrupsionin dhe Krimin e Organizuar, verifikuar dhe lënë në fuqi me vendimin nr.4, datë 13.01.2025, të Gjykatës së Posaçme të Shkallës së Parë për Korrupsionin dhe Krimin e Organizuar”, njoftoi GJKKO.
Por gazetarja Glidona Daci ka mësuar se Farruku nuk do të lirohet nga qelia pavarësisht këtij vendimi.
Gjykata e Apelit me juridiksion të përgjithshëm i ka ndryshuar masën e dhënë nga gjykata e Durrësit nga arrest shtëpie në arrest me burg, me qëllim ekstradimin e tij drejt Italisë.
Autoritetet italiane pretendojnë se Kreshnik Farruku pastronte para përmes një rrjeti kompanish të drejtuara nga një organizatë italo-kineze.
Sipas Prokurorisë së Breshias, këto kompani kanë lëshuar fatura fiktive dhe kanë arritur që të pastrojnë rreth 375 milionë Euro. Kreshnik Farruku dyshohet për trafik droge në kuadër të grupit të strukturuar kriminal dhe pastrim parash.
Emri i Kreshnik Farrukut është përmendur prej vitesh nga drejtësia e Spanjës dhe Italisë për shkak të dyshimeve se ishte i përfshirë në trafik droge. Për herë të parë emri i tij është përmendur në vitin 2010 nga drejtësia spanjolle.
Në atë kohë ai u arrestua në Spanjë me 20 kg kokainë. 4 vite më vonë në vitin 2014, Kreshnik Farruku është arratisur nga burgu në Spanjë për tu ri-arrestuar në vitin 2019.
