Një ditë pasi dëshmoi në SPAK në lidhje me dosjen e kryebashkiakut Erion Veliajt, deputetja e PS, Klotilda Bushka nuk ka qenë në krye të komisionit të ligjeve për ta drejtuar.
Gjatë kësaj mbledhje, deputeti i PD, Dashnor Sula kërkoi nga të gjithë anëtarët e komisionit që të dalin me një deklaratë të përbashkët ku të distancohen nga veprimet e kryetares së Komisionit.
Sipas tij, Bushka me veprimet e saj ka dëmtuar imazhin e komisionit të ligjeve.
“Ky komision do të duhet të kishte pasur një qëndrim dhe nuk mund të kalojë në një gjendje kaq të heshtur. Të gjithë anëtarët e komisionit të ligjeve mazhorancë dhe opozitë së bashku të bënim një deklaratë të distancimit. Është e paimagjinueshme që kryetarja e komisionit të ligjeve të jetë personi që ka kryer veprime në kundërshtim të hapur me ligjin.
Kudo mund ti ndodhë, por me një vetëdije të paparë në pengimin e hetimit të drejtësisë për kryetarin e bashkisë Erion Veliaj, kjo është e paimagjinueshme, e pafalshme.
Prandaj unë do të kërkojë nga ju zoti drejtues i këtij komisioni që të kemi një deklaratë apo një prononcim që të distancohemi nga kjo sjellë që ka bërë kryetarja e Komisionit të Ligjeve, sepse ka dëmtuar rëndë imazhin e Komisionit të Ligjeve”, u shpreh Sula.
