Zyrtarët e lartë amerikanë dhe rusë do të takohen të martën në Arabinë Saudite me qëllim rikuperimin e marrëdhënieve diplomatike dhe fillimin e negociatave për t’i dhënë fund luftës Rusi-Ukrainë.
Kremlini ka thënë se bisedimet që do të mbahen në qytetin Riad mund të hapin rrugën për një takim ballë për ballë mes Presidentit të SHBA-së, Donald Trump dhe udhëheqësit rus Vladimir Putin.
Kjo vjen pasi dy liderët patën një telefonatë të gjatë të mërkurën e kaluar.
Por kush do të përfshihet ditën e nesërme në diskutime?
Marco Rubio
Sekretari amerikan i Shtetit, Marco Rubio i cili mbërriti në Riad sot, shërben si këshilltari kryesor i presidentit për punët e jashtme dhe është diplomati më i lartë i Shteteve të Bashkuara.
Rubio, një ish-senator i Floridës, ka folur tashmë me ministrin rus të punëve të jashtme Sergey Lavrov në një telefonatë të shtunën, duke diskutuar për luftën në Ukrainë dhe çështje të tjera.
Para se të bëhej sekretar i shtetit, Rubio deklaroi se Ukraina duhej të kërkonte një zgjidhje me Rusinë në vend që të fokusohej në rifitimin e të gjithë territorit që Rusia ka marrë në dekadën e fundit.
Michael Waltz
Këshilltari amerikan për sigurinë kombëtare, Michael Waltz, do të jetë së bashku me Rubion gjatë bisedimeve SHBA-Rusi.
Waltz është një veteran që ka shërbyer në Afganistan, Lindjen e Mesme dhe Afrikë.
Që nga viti 2019, ai ka përfaqësuar një grup kongresi në Dhomën e Përfaqësuesve, ku është anëtar i komiteteve të Shërbimeve të Armatosura, Punëve të Jashtme dhe Inteligjencës amerikane.
Para emërimit të tij në kabinetin e zotit Trump, ai shkroi një artikull në ‘The Economist’ që parashtronte pikëpamjen e tij se si SHBA mund të lëvizte për të bindur Rusinë për t’i dhënë fund luftës.
“Amerika mund të përdorë kartën ekonomike, duke përfshirë heqjen e pezullimit në eksportet e gazit natyror rus dhe goditjen e shitjeve të paligjshme të naftës nga Rusia, për të sjellë Putin në tryezë,” shkroi ai në artikull.
“Nëse ai refuzon të flasë, Uashingtoni, siç argumentoi Trump, mund t’i ofrojë më shumë armë Ukrainës me më pak kufizime në përdorimin e tyre. Përballë këtij presioni, Putin ndoshta do të përfitojë nga mundësia për të zbutur konfliktin.”
Steve Witkoff
Witkoff, i dërguari i posaçëm i Trump në Lindjen e Mesme, është një mik prej kohësh i presidentit dhe një i besuar i tij nga biznesi i shit-blerjes së pasurive të paluajtshme nga ku të dy kanë fituar miliardat e tyre.
67-vjeçari, i cili e njeh Trump prej dekadash, është një donator republikan dhe shërbeu në një nga Grupet e Industrisë së Ringjalljes Ekonomike Amerikane të Presidentit për të luftuar efektet e pandemisë COVID-19.
Witkoff ka qenë mjaft i zënë në detyrën e tij e tij të ri në Lindjen e Mesme, duke qenë njeriu i besuar i presidentit Trump në dhomën e negociatave jashtëzakonisht të vështira të armëpushimit Izrael-Hamas.
Sergei Lavrov
Sergei Lavrov është ministri i jashtëm i Rusisë që nga viti 2004 kur e mori këtë rol për herë të parë.
Zyrtari i dekoruar i Kremlinit është përshkruar si “mjeshtër i arteve të errëta të diplomacisë ruse” nga Dominic Waghorn, një gazetar i çështjeve kombëtare.
Ai tha se Lavrov është “një mashtrues diplomatik që shan dhe ngacmon aty ku e sheh të arsyeshme”. Ai është i njohur, për pretendimet e tij të çuditshme për realitetin e luftës.
Yuri Ushakov
Këshilltari për politikën e jashtme të Putinit, Yuri Ushakov do t’i bashkohet z. Lavrov dhe palës ruse në tryezën e bisedimeve.
Amerikanët njihen me zyrtarin e Kremlinit, pasi ai shërbeu si Ambasador i Rusisë në Shtetet e Bashkuara nga viti 1998 deri në 2008 përpara se të merrte postin e tij aktual në vitin 2012.
Bisedimet do të jenë ndër diskutimet e para të nivelit të lartë në vite mes zyrtarëve rusë dhe atyre amerikanë dhe kanë për qëllim t’i paraprijnë një takimi midis Trump dhe Putin.
Rubio tha se javët dhe ditët e ardhshme do të përcaktojnë nëse Putin është gati për të bërë paqe.
