Kryeministri Edi Rama ditën e djeshme pati një reagim të gjatë në rrjetin e tij social, ku u ndal më shumë në zhvillimet e fundit të aktualitetit të cilat lidhen edhe me hetimet ndaj vëllait të tij, por jo vetëm.
Lidhur me këto deklarata, gazetari Bledian Koka në studion e emisionit “Opinion” u shpreh se Kryeministri i bën këto lloj fjalimesh kur sheh ndryshime në sondazhe.
Ndër të tjera gazetari Koka u shpreh se tashmë ka ndryshuar elektorati, pasi në lojë është futur edhe vota e diasporës. Sipas tij emigracioni pas viteve 2013 është emigracion intelektual dhe se këto persona që janë larguar nga Shqipëria e dinë shumë mirë faktin pse janë larguar nga vendi.
Bledian Koka: Edi Rama reagimet e tij me aq sa kam informacion është që zoti Rama këto dalje të kësaj natyre i bën vetëm kur diçka lëviz tek sondazhet që është elementi i vetëm që e dikton artikulimin e tij apo mesazhe të caktuara. Unë mendoj që zakonisht kur sondazhet çedojnë, jo në mënyrën që zoti Rama ka pritshmërinë e tyre është pikërisht ky lloj artikulimi. Edi Rama është aq i vjetër në pushtet saqë 99% të atij fjalimi e ka thënë para 10 vitesh këtu në studion tënde. Para se të vinte në pushtet ka ardhur këtu tek ti dhe foli për nënën ndjesë pastë, për të birin, për martesën e dështuar edhe madje ju tha edhe socialistëve që shikoni unë do ta bëj një aleancë me Ilir Metën sepse të gjitha ato që kanë ndodhur do t’i marrë unë në kurriz dhe do t’ju sjell unë në pushtet. Dhe koha i dha të drejtë deri në këto momente. Pyetja është pse e ka rikthyer të njëjtin fjalim sot?
Blendi Fevziu: Po pra pse u rikthye ky…
Bledian Koka: Sepse unë pajtohem me atë që tha Ornela që ka ndryshuar edhe elektorati dhe është një elektorat që është jo vetëm në Shqipëri, por edhe elektorati jashtë shtetit. Emigracioni që ka ndodhur nga 2013 deri në këto vite ka qenë emigracion cilësor, pra intelektual të njerëzve që e dinë shumë mirë përse u larguan nga Shqipëria dhe arsyeja është kjo qeverisje dhe prandaj ata që mendojnë se opozita ka bërë një gabim duke pranuar votën e emigrantëve e kanë gabim.
