Mbledhja e Komisionit Hetimor për Koncesionet në Shëndetësi është mbyllur rreth orës 2 të mëngjesit, pas orësh të tëra debate, por pa dëshminë e ish-ministrit të Shëndetësisë Ilir Beqaj.
Mbledhja është mbyllur me një episod që sipas deputetëve të opozitës përbën skandal. Ndërkohë që diskutohej kthimi i Beqajt sërish në burg pasi kishte kaluar mesnata dhe leja e marrë, ai ka hyrë në komision dhe iu është hakërryer deputetëve të PD. Pas kësaj deputetët kanë reaguar të indinjuar dhe i kanë kërkuar policisë të reagojë dhe ta kthejë në burg.
Vokshi: Kush je ti more, kush je ti që hyn ashtu. Urgjent policia ta kthejë në burg Ilir Beqajn. Guxon të hyjë në atë mënyrë në sallën e mbledhjeve të Komisionit. Sekretaria njoftoni policinë. Çojeni tani. Urgjent të vijë policia.
Zhupa: Nuk mund të hyjë ai dhe të na kërcënojë ne. I keni dhënë liri të livadhisë në Kryesinë e Kuvendit.
Spaho: Ndërprisni mbledhjen, i thoni policisë ta marrë.
Vokshi: Vjen ai dhe kërcënon, ju si nuk flisni?! Si mundet të hyjë ai ashtu. I japin garanci këta.
Spaho: Të merret masë ndaj avokatit, punonjësve të Gardës që e lejuan.
Vokshi: Ju lutem shumë, që ta kuptojë publiku. Ai person që erdhi i shoqëruar nga policia e Burgjeve bredh i lirë në të gjitha ambientet, ka futur hunj, drunj mjete të forta dhe është lejuar, i lirshëm që të shkojë ku të dojë. Futet në këtë mbledhje bashkë me avokatin dhe u lejua dhe nga policia dhe nga Garda. Ky është një skandal. Garda duhet të marrë masa për atë djali nqë e la të hynte.
Spaho: Pamjet e kamerës duhen administruar dhe duhet të informohet opinioni publik.
Vokshi: Si s’të vjen turp ty dhe gjithë të tjerëve. Ti mos guxo të ma bësh mua ashtu, të të vijë turp ty dhe të gjithë ju që nuk reagoni. Turp t’ju vijë. Futet ai me pranga dhe na kërcënon. Nuk është i lirë ai të bëjë çfarë të dojë. Ai duhet të ishte i mbyllur në një sallë. Të guxojë Ilir Beqaj dhe të futet e të kërcënojë deputetët e opozitës është skandal, askush nga ju nuk guxon të flasë. Çfarë do bësh?
Ilir Metaj: Ty s’kam çfarë të bëj.
Vokshi: Ti po kërcënon. Po ça kujtoni ju. Ik merr një dajre në dorë dhe një fyell se nuk e ke vendin këtu.
Ina Zhupa: Juve t’u vijë turp se dhe po të ishte cilido dëshmitar, asnjë nuk lejohet të hyjë këtu brenda. Ai hyri dhe kërcënoi deputetët pse i thamë të zbatojë ligji. Juve t’ju vijë turp se jeni palë. Ju guxoni ta lini Ilir Beqajn që të livadhisë i lirë në Kryesinë e Kuvendit pa pyetur për polici, për Gardë. Ne kemi celularët, nuk lejohemi të kërcënohemi nga asnjë i burgosur dhe as Edi Rama.
Vokshi: Vajta vetë dhe i thashë personelit të Policisë së Burgjeve që ta largojë urgjentisht nga ambientet e Kryesisë së Kuvendit. Nuk ka ndodhur ndonjëherë një skandal kaq i madh që të guxojë një dëshmitar, edhe i zakonshëm të hyjë dhe të kërcënojë deputetët e opozitës. Nuk ka ku shkon më. Për ccfarë po rrimë ne këtu. Çfarë duhet të ndodhë tjetër. Unë e konsideroj të mbyllur mbledhjen e sotme. Nesër do ftoja kryesinë e komisionit që të mblidhemi, të bëjmë shkresat përkatëse që tua dërgojmë gjithë institucioneve, garda, drejtorisë së Burgjeve, ministrit të Drejtësisë, ministrit të Brendshëm, kryetares së Parlamentit, Kryeministrisë që t’i tregojmë skandalin që ka ndodhur.
Ndrecaj: Mbledhjen nuk mund ta mbyllni ju..
Komisioni Hetimor për Shërbimet Publike të Sterilizimit dhe të Check-up në Shëndetësi, vijoi ditën e djeshme me debate mes opozitës dhe mazhorancës, për disa orë me radhë deri pas mesnate, ndërkohë që mandati përfundon më 14 nëntor.
Debatet nisën në lidhje me dëshminë e ish-ministrit Ilir Beqaj, i cili për dy ditë me radhë u shfaq në Kryesinë e Kuvendit, për të dhënë dëshminë e tij në Komision, por dëshmia e tij nuk u dha për shkak të debateve mes deputetëve të mazhorancës dhe opozitës.
Por teksa Beqaj priste të jepte dëshminë në kryesinë e Kuvendit, deputetët e PD-së insistuan që në Komision të thirren për të dëshmuar Vilma Nushi si dhe kryeministri Edi Rama.
Nga ana tjetër socialistët akuzuan demokratët se nuk po lejojnë që Beqaj të japë dëshminë e tij, ndërsa Albana Vokshi dhe deputetë të tjerë të opozitës, zhvendosën debatin te përfituesja e koncesionit të Check Up, Vilma Nushi.
Plarent Ndreca, nënkryetar i këtij komisioni, kërkoi vazhdimin e rendit të ditës që është miratuar, duke theksuar se “nëse doni të bëni monologë, vazhdoni me monologët tuaj, ne duam të vijojmë me rendin e ditës”. Sipas tij, është e rëndësishme që të thirret dëshmitari dhe të vazhdohet me procesin hetimor, pasi është miratuar një rend dite i qartë.
“Ne nuk po arrijmë dot të respektojmë rendin e ditës. Ne kemi që në orën 10:30 që kërkojmë të thirret dëshmitari dhe të dëgjojmë dëshmitarin”- u shpreh Ndreca.
Sakaq në Konferencën e Kryetarëve u rrëzua kërkesa e PD-së për shtyrje të afatit të Komisionit Hetimor.
