Të mërkurën në mbrëmje në emisionin “Opinion” u diskutua për atentatin e ndodhur në Shkodër, ku si pasojë humbën jetën Hamza Lici dhe Flutura Basha.
Ndërsa Arlind Bushati i cili ndodhej në makinë bashkë me Licin ndërroi jetë në spital 6 orë më vonë pas atentatit. Prania në kohë dhe vendin e gabuar të çifti Basha i morën jetën gruas Flutura Basha, teksa nga ana tjetër bashkëshorti i saj Bashkim Basha ndodhet në spital duke luftuar për jetën, gjendja e tij shëndetësore aktualisht është e rëndë.
Ngjarja e rëndë hapi dhe një tjetër temë diskutimi, atë të viktimave të pafajshme. Krimi nuk po “ha më kokat” e njërit-tjetrit, por të qytetarëve të pafajshëm, siç ishte dhe rasti i çiftit Basha.
Të ftuar: Glidona Daci, Helena Halilaj, Akil Pano, Merin Maçi, Lorenc Vangjeli, Bardh Spahia. Në lidhje direkte: Emi Kalaja
Në pjesën tjetër të emisionit ishte Adila Hoxha, e cila tregoi kujtimin e të atit dhe historinë e saj.
Adila Hoxha është një shqiptaro-filipinase e lindur në Australi. Babai i saj ishte një i arratisur politik gjatë viteve të komunizmit, i cili u largua drejt Australisë ku dhe u martua me një grua filipinase. Falë përkushtimit të të atit, i cili në një moshë të madhe dëshironte që vajza e tij të ndjehej shqiptare, Adila Hoxha sot flet në shqipe të përkryer. Përtej kësaj ajo është dhe mbesa e Daut Hoxhës, një personazhi të njohur të Çamërisë që u bë “strumbullari” i luftës italo-greke në vitin 1940./Opinion.al
