Gjykata e Tiranës ka caktiar masën e sigurisë “arrest në burg” për Klajdi Hakën, kushëririn e Marklen Hakës, i cili u arrestua pak ditë më parë.
Klajdi Haka akuzohet se ka strehuar shtetasin Marklen Hakën teksa ishte në kërkim ndërkombëtar.
Klajdi Haka, banues në Zezë të Niklës akuzohet për veprat penale “Mbajtja pa leje dhe prodhimi i armëve, armëve shpërthyese dhe i municionit” dhe “Përkrahja e autorit të krimit”.
Gjatë kontrollit të ushtruar në banesën e 21-vjeçarit u gjet dhe sekuestrua, në cilësinë e provës materiale, një armë zjarri pistoletë.
Kujtojmë se 33-vjeçari Marklen Haka nuk është një emër i panjohur për policinë.
Në vitin 2019 ai i shpëtoi një atentati ku mbeti e vrarë halla e tij Shpresa Basha, 50 vjeç e cila sipas dëshmive të deponuara mbrojti nipin e saj.
Në qershor të vitit 2011, kur ishte vetëm 20 vjeç ai u arrestua si autor i vrasjes së një biznesmeni në zonën e ish-Bllokut në Tiranë.
Pas marrjes në pyetje në polici Haka mohoi vrasjen, pasi tha se nuk ka qenë në Tiranë, ndërsa pas 1 muaji u lirua pasi nuk u arrit të provohej ngjarja e rëndë.
