Deputeti Ervin Salianji nuk u paraqit as në seancën e sotme që zhvillohet ndaj tij në Gjykatën e Apelit, duke kundërshtuar dënimin me 1 vit burg të dhënë nga Shkalla e Parë për “kallëzim të rreme” në çështjen “Babalja”.
Të pranishëm në sallë janë dy avokatët e deputetit Ervin Salianji, Marash Logu dhe Redi Ramaj, ndërsa mungon sërish për të disatën herë deputeti demokrat.
Po ashtu i pranishëm është edhe avokati i Geron Xhafës, Ardian Visha. Mungon në këtë seancë avokati Indrit Sefa, avokati i Jetmir Olldashit.
Ky i fundit ka paraqitur kërkesë për shtyrjen e seancës gjyqësore, me argumentin se nuk është në gjendje të mirë shëndetësore.
Ndërkohë avokati Ardian Visha, mbrojtës i Geron Xhafajt thotë se kjo është një mënyrë për të zvarritur çështjen.
“Është një vijimësi e lojës së ping pongut të avokatëve të të pandehurve për të zvarritur dhe shtyrë këtë çështje. Gjykata duhet të gjejë një mënyrë që t’i dhënë fund kësaj loje dhe për t’i dhënë fund procesit, qoftë edhe me avokatë kryesisht”, tha ai.
