Ka pasur një interes të lartë për blerjen e biletave për ndeshjen Shqipëri-Serbi. Konkretisht, janë rreth 50 mijë aplikime për bileta, vetëm një javë pas hapjes së procesit për rezervimin. Shifrat u bënë publike në platformën e-bileta, ku ndër të tjera konfirmohet interes i jashtëzakonshëm në radhët e tifozëve.
Sipas rregullave të caktuara, çdo aplikues mund të rezervojë maksimalisht deri në katër bileta dhe me llogari të thjeshta do të nevojiteshin 200 mijë vende për të mbuluar kërkesën.
Me fjalë të tjera, për sfidën kualifikuese të Shqipërisë me Serbinë më 7 qershor do të duheshin dhjetë stadiume si “Arena Kombëtare”, për t’iu përgjigjur kërkesës së tifozëve. Impianti më i madh në vend ka 22 mijë e 500 vende, por sipas specifikave të ndeshjeve, për eventet e UEFA-s janë shitur 21 mijë e 500 bileta. Shifra zyrtare e spektatorëve në tribuna pritet ende të bëhet publike, e ndoshta stadiumi mund të jetë me kapacitet të plotë, duke qenë se në Tiranë nuk do të ketë tifozë serbë.
Afati i aplikimeve për rezervimin e biletave është deri më 30 maj. Nga kjo datë, kur do të bëhet edhe përzgjedhja automatike me short, deri më 2 qershor, tifozët fatlumë do të marrin një link unik për kryerjen e pagesës për biletat elektronike.
