Kryeministri Edi Rama dhe Sekretari i Jashtëm të Britanisë së Madhe, David Cameron po mbajnë një konferencë për shtyp pas takimit në Kryeministri.
Gjatë fjalës së tij, Rama tha se në këtë takim kanë folur për thellimin e marrëdhënieve dy palëshe.
Ai theksoi se kanë folur për një nga projektet me rëndësi të veçantë që është hekurudha Durrës Prishtinë, që sipas tij është element kyç jo veç mes dy vendeve por në rajon e më gjerë.
“Kemi një mik të veçantë një personalitet të njohur të politikës. Jo vetëm që kemi një mik nga një vend aleat dhe partner i rëndësishëm, sekretarin e shtetit për çështjet e Jashtme, por edhe në të njëjtën kohë një mik të posaçëm të këtij rajoni dhe të Shqipërisë që më në fund erdhi në Tiranë pasi e ka marrë ftesën prej disa vitesh dhe tani jam i bindur se do rikthehet përsëri.
Sot kemi diskutuar për marrëdhëniet tona dy palëshe dhe thellimin e mëtejshëm të tyre. Kemi folur si në aspektin e marrëdhënieve si dy vende aleate në Nato qoftë në aspektin e marrëdhënieve bilaterale në kushtet kur Mbretëria e Bashkuar synon të jetë më e pranishme në vendin tonë. Jemi duke folur për një projekt me rëndësi të veçantë që është hekurudha Durrës Prishtinë, element kyç jo veç mes dy vendeve tona por në rajon e më gjerë. Duke pasur parasysh se ne hapim garën për portin e ri ndërkombëtar të Durrësit”, tha ai.
