Një shtetase shqiptare është goditur me thikë ditën e sotme jashtë një shkolle fillore në qytetin e Londrës. Sipas informacioneve, ngjarja dyshohet se ka ndodhur pak pasi shqiptarja ka lënë fëmijët në shkollë. Daily Mail raporton se sulmuesi, i cili dyshohet se është ish-bashkëshorti i saj, e ka kapur për fyti dhe e ka goditur disa herë me thikë.
Policia e Bedfordshire konfirmoi se ngjarja e rëndë ka ndodhur pranë një shkolle në Dunstable Road, Luton, pak pas orës 8:30 të mëngjesit të sotëm. Gruaja shqiptare u dërgua në spital pasi ka marrë lëndime të rënda pas sulmit, ndërsa një burrë u arrestua pak më pas, por identiteti i tij nuk është bërë ende publik.
Në vendngjarje janë ndodhur edhe dëshmitarë, të cilët thanë për DailyMail se e kanë dëgjuar të plagosurën duke bërtitur: “Më ndihmo, më ndihmo… po humbas gjaku”.
Ndërkohë banorët e zonës thanë se viktima kishte pasur probleme me një burrë, ndoshta ish-bashkëshorti, i cili ishte paraqitur në adresën e saj dhe ishte bërë i dhunshëm.
“Unë njoh njerëz afër vendit ku ajo jeton dhe mesa duket është me origjinë nga Shqipëria. Ajo jeton me fëmijët e saj që shkojnë në shkollën lokale. Ajo u sulmua menjëherë pasi i kishte lënë”, tha një grua në zonë.
