Pedro Sanchez është rizgjedhur kryeministër i Spanjës. Një shumicë e ligjvënësve në Kongresin e Deputetëve të Spanjës votuan për Sanchez, duke përfshirë separatistët.
“Unë jam shumë i vetëdijshëm për këtë dhe dua t’u them të gjithë kritikëve se i respektoj jashtëzakonisht mendimet e tyre. Por rrethanat janë ato që janë” –tha ai pasi u rizgjodh kryeministër.
Ligjvënësit e krahut të djathtë bërtisnin “i paturpshëm” dhe “gënjeshtar” ndërsa ai fliste, raportojnë mediat e huaja.
Sánchez siguroi 179 vota në favor të tij, me 171 deputetë që votuan kundër.
Dy partitë separatiste katalane nuk janë pjesë e koalicionit të Sánchez, por atij do t’i duhen votat e tyre sa herë që dëshiron të miratojë një buxhet apo projekt-ligj.
Policia ka vendosur 1,600 oficerë dhe ka barrikaduar parlamentin për ta mbrojtur atë nga protestat. Pas ditës së mërkurë, demonstruesit kundër amnistisë u mblodhën për natën e 12-të radhazi jashtë selisë së socialistëve.
Amnistia do t’i japë fund çështjeve penale kundër disa qindra liderëve pro-pavarësisë dhe mbështetësve të përpjekjes së Katalonjës në vitin 2017 për t’u shkëputur nga Spanja. Akuzat e tyre variojnë nga rebelimi dhe shkeljet e rendit publik deri te shpërdorimi i fondeve publike.
Sánchez, i cili u zotua të drejtojë një qeveri të re progresive, tha se falja e tyre do të qetësonte një konflikt të gjatë mbi statusin e Katalonjës dhe do të prodhonte një Spanjë më të bashkuar përmes “rrugës së dialogut, mirëkuptimit dhe faljes”.
