Avokatit Alket Hyseni dhe pedagoges Ornela Çuçi janë përfshirë në një debat në emisionin “Opinion” për çështjen e censit.
Hyseni deklaroi se duke qenë se formulari është i fshehtë, secili të deklarohet si e ndjen dhe të mos presionohet nga faktorë të tjerë.
Kjo deklaratë e Hysenit është kundërshtuar nga Çuçi, e cila tha se babai i saj është e pamundur të mos ndikohet për t’u deklaruar grek, ndërkohë që një pensionist në Shqipëri merr 150 mijë Lekë të vjetra.
Alket Hyseni: Sot është momenti t’u themi atyre shqiptarëve apo qytetarëve shqiptarë që të mos ndikohen nga një pension sado që të jetë ai, nga një presion për vizë, nga një presion se mund të pengohet për një punë të mirë. Është i fshehtë formulari, le të deklarohet ashtu si e ndjen, është shqiptar të deklarohet shqiptar. Është grek, të deklarohet grek.
Ornela Çuçi: Alket, të mos ndikohet babai im që merr 152 mijë Lekë të vjetra?
Marin Suli: Është i sinqertë në këtë që thotë se i ka dalë partia për zot Censusit. Familja e kryetarit të Partisë Socialiste në Himarë po bën Censusin.
Alket Hyseni: Unë jam koherent, unë jam qytetar i këtij vendi, jam krenar se kemi një standard që vendet rreth nesh nuk kanë për ta arritur as për 2-3 dekada. Italia për shembull, është një vend shumë i zhvilluar, ligjin e ka më mbrapa se ne. Greqia s’ka fare.
Ornela Çuçi: Po si e ke arritur këtë standard more Alket, po si e çon standardin deri këtu kur pensioni i babit tim është 152 mijë Lekë të vjetra dhe ti i thua babit tim “mos shko të marrësh pensionin e grekut?”
Alket Hyseni: Babi jot dhe babi im janë shqiptarë.
Ornela Çuçi: Janë shqiptarë dhe do ta mbajnë gjithë jetën, jam dakord, por si i thua ti një komuniteti pensionistësh që merr 150 mijë Lekë të vjetra në muaj, mos shko të marrësh pensionin e grekut?
Alket Hyseni: Po ata njerëz që kanë dinjitet, kanë integritet…
Ornela Çuçi: Po, po kanë integritet pensionistët shqiptarë, por e kanë 152 mijë lekë të vjetra pensionin!
