Presidenti, Bajram Begaj, ka dhënë një intervistë për “Zërin e Amerikës” teksa ndodhet në Neë York, ku ka ka folur edhe për tre ligje shumë të diskutuara të qeverisë, ligjin për studentët e Mjekësisë, atë për legalizimin e kanabisit mjekësor dhe për Akademinë e Shkencave, të cilat i kaloi në heshtje.
Në fjalën e tij, Begaj u shpreh se arsyeja për kalimin në heshtje të tyre “nuk ka të bëjë me një mosvendimmarrje të presidentit, por me faktin e dilemave Kushtetuese që presidenti kishte”.
“Ka pasur diskutime publike. Mekanizmi kontrollues kushtetues i Presidentit për rastin në fjalë për çdo ligj është që t’i përmbahet strikt kushtetutës. Nuk mund të niset vendimmarrja nga opinione personale apo politike. Çdo ligj i miratuar nga Kuvendi i nënshtrohet një procesi të rregullt që shikon nëse ky ligj është në përputhje të plotë me Kushtetutën. Asnjë prerogativ nuk mund të ndikojë në vendimmarrjen e presidentit. Për ligjin për studentët e mjekësisë, bëra një takim me ta, të cilët e shikojnë ligjin nga shkelja e të drejtave të tyre. Ndërkohë që qeveria nga ana tjetër e shikon ligjin nga një interes madhor publik që qytetarët shqiptarë të kenë mbulim me shërbim shëndetësor. Kjo lloj kontradikte nëse do të kishte vendimmarrje të Presidentit qoftë në rast të dekretimit, qoftë në rast të kthimit mbrapsht në parlament, do të kishte një ndikim jo proporcional ligjor për secilën palë. Kështu që në këtë rast vendosa të mos mbaj anë dhe t’i lë mundësinë palëve të interesuara të angazhohen në një mekanizëm tjetër kontrollues kushtetues që mund të jetë Gjykata Kushtetuese. Heshtja ime në këtë rast nuk ka të bëjë me faktin që ishte një mosvendimarrje e presidentit, por me faktin e këtyre dilemave kushtetuese që presidenti kishte”, tha ai.
Presidenti Begaj po ashtu shtoi se në takimet e tij në OKB ka shprehur nevojën për mbështetjen ndaj Kosovës.
“Kam shprehur nevojën e mbështetjes së Kosovës, jo vetëm si mbështetje morale, por edhe në drejtim të njohjeve të reja. Mbështetja e Kosovës është domosdoshmëri. Domosdoshmëri jo vetëm për Kosovën, por për gjithë rajonin. Për faktin që faktori shqiptar është një faktor mjaft i rëndësishëm për paqen, për sigurinë për mirëqenien dhe për zhvillimin e qëndrueshëm. Është detyrë e çdo qytetari dhe shtetari për të mbështetur Kosovën”, tha kreu i shtetit duke theksuar se Shqipëria mbështet fuqimisht dialogun mes Kosovës dhe Serbisë.
“Nuk kemi nevojë për vetizolim, por për miq, për mbështetje. Kështu që duhet patjetër që çdo rekomandim i dhënë nga aleati ynë strategjik duhet të dëgjohet. Duhet të dëgjohet më së tepërmi nga politikanët e Kosovës”, tha Begaj.
