Në një takim me bizneset në Kukës, ish-kryeministri Sali Berisha është shprehur se PD është parti e taksave të ulëta.
Ai u ndal te ndërtimi i rrugëve dhe tha për Unazën e Madhe të Tiranës se në vitin 2012-2013 u ndërtuan 7.5 kilometra, mbetën edhe 17.5 kilometra që edhe sot, pas 10 vitesh nuk ka përfunduar.
Berisha theksoi se nëse 7.5 kilometrat e para me gjithë veprat shkuan në 3 milionë euro kilometri, sot ndërtojnë me 24 mln euro kilometric.
Ai premtoi se me qeverisjen e PD kjo situatë do të marrë fund. Ndërsa sa i takon Rrugës së Kombit, ish-kryeministri theksoi se e ka nxjerrë nja 4 herë veten deri tani, por gjithsesi po paguhen taksa për këtë rrugë.
“Së fundmi ne jemi, ju e dini, parti e taksave të ulëta. Në parimin tonë, taksa e lartë është e dëmshme. Sepse paratë në llogarinë bankare të biznesit, janë më të dobishme për shoqërinë se në llogarinë bankare të shtetit. Kurse këta e kanë mendjen te taksat e larta dhe vjedhjet stratosferike.
Po ju jap një shembull. Duke ardhur Rrugës së Kombit, m’u kujtua.
Rruga e Kombit ka marrë përafërsisht dy vite, dy vite e pak. Mos harroni kur dëgjoni lajmet për Unazën e Tiranës. Ajo është gjithsej 25 km, një projekt i trashëguar nga qeveria komuniste e Adil Çarçanit. Gjurma e saj është e miratuar nga ajo qeveri.
Unaza e Madhe në vitin 2012-2013 e ndërtuam 7.5 kilometra. Mbetën edhe 17.5 kilometra. Edhe sot, pas 10 vitesh, ajo nuk ka përfunduar.
Sot, pas 10 vitesh, nëse 7.5 kilometrat e para me gjithë veprat shkuan në 3 milionë euro kilometri, sot ndërtojnë me 24 mln euro kilometri. Dhe e copëtojnë në lote që të vjedhin në çdo lot sa më shumë. Sot, 2.2 milionë euro të shpenzuara në rrugë u janë dhënë 5 kompanive. Të gjitha klientelë e Edi Ramës, me të cilin ndan paratë.
Kjo situatë merr fund. Ne rikthehemi në standardet më të mira të prokurimeve, rikthehemi te një luftë me zero tolerancë ndaj korrupsionit dhe krimit të organizuar. Rikthehemi gjithashtu, e them këtu, te një shpërndarje shumë më e drejtë e të ardhurave në Shqipëri.
Nuk mundet që kaskada të jetë kontributori më kryesor në prodhimin e brendshëm dhe buxhetin e shtetit dhe banorët e saj të mos përfitojnë një qindarkë. Kur ua thashë njëherë në parlament, u ngrit ajo Ballukja e tha se aty kanë investuar të gjithë. Kanë investuar të gjithë, por pasuria ka qenë e tyre.
Edhe ata që kanë investuar, e kanë marrë nja 30 herë atë investim.
Edhe Rruga e Kombit e ka nxjerrë nja 4 herë veten deri tani, por ju paguani taksën”-tha Berisha.
