Gazment Bardhi ka folur në një dalje për mediat pas seancës parlamentare ku u votuan ndryshimet në qeveri.
Gjatë fjalës së tij, Bardhi tha se nuk u lejua debati parlamentar.
Ai shtoi se Rama është i paaftë për të mbrojtur ndryshimet e veta në kabinetin qeveritar.
Sipas tij, nuk ka asnjë rëndësi si quhen ministrat e rinj apo të vjetër të Ramës, pasi njëlloj do mbrojnë korrupsionin.
Ndër të tjera ai theksoi se problemi i kësaj qeverie nuk janë anëtarët e kabinetit por vetë Rama.
“Edhe pse sot u formatua gjysma e kabinetit qeveritar, nuk u lejua një debat parlamentar për këto ndryshime në qeveri. Nuk kemi shpjegim pse ditën e parë të shkollës shkarkohet ministrja e Arsimit, pse shkarkohet ministrja e Jashtme kur përpara kemi samitin e Berlinit.
Edhe kur propozimet e kryeministrit vijnë për votim, ai është i paaftë për të mbrojtur ndryshimet e veta në kabinetin qeveritar.
Shqiptarët e kanë kuptuar që sado makijazh të bëjë të kabinetit, vulën e korrupsionit nuk e heq dot. Nuk ka asnjë rëndësi si quhen ministrat e rinj apo të vjetër të Ramës, njëlloj do vazhdojnë pagesat për inceneratorët, njëlloj do vazhdojnë të mbrojnë korrupsionin e Edi Ramës. Problemi i kësaj qeveri nuk janë anëtarët e kabinetit, por Rama”, tha Bardhi.
