Kryeministri Edi Rama ka inspektuar ditën e sotme ambientet e shkollës së rikonstruktuar të Hoteleri-Turizëm në Tiranë.
Lajmin e ka bërë të ditur vetë kryeministri Rama, i cili përmes një postimi në rrjete sociale shkruan se kjo shkollë do të jetë një suport i madh për këtë sektor.
Rama bën me dije se shkolla ka nisur certifikimin nga ajo e Lausanne e cila është më e mira në botë për Hotelerinë.
Ai thekson se përmirësimi i kushteve dhe cilësisë do të jetë në fokusin kryesor, sidomos kur Shqipëria po përjeton një fluks të jashtëzakonshëm turistësh.
“Në shkollën e rikonstruktuar të Hoteleri-Turizëm në Tiranë, e cila ka nisur certifikimin nga Shkolla e Lausanne, më e mira në botë për Hotelerinë, që do të mbështesë nevojat e sektorit Hoteleri-Turizëm në një kohë kur arsimi profesional po preferohet përherë e më shumë nga të rinjtë, ndërsa 80 % e studentëve punësohen që në bankat e shkollës me pagesa konkurruese për tregun. Vëmendja për përmirësimin e kushteve dhe cilësisë do të jetë në fokusin tonë kryesor, sidomos sot kur Shqipëria po përjeton një fluks të jashtëzakonshëm turistësh”, shkruan Rama./Opinion.al
