Policia ka liruar dy vëllezërit Durim e Valter Bami dhe Marklen Hakën të cilët u shoqëruan ditën e djeshme për t’u marrë në pyetje si persona që mund të kishin dijeni për atentatin ndaj Gentian Bejtjas ku mbetën të vrarë kunati i tij Ramazan Sino dhe u plagosën dy fëmijët e mitur të objektivit.
Pasi dhanë deklarimet mësohet se ata janë lënë të lirë nga Policia e Krujës.
Sipas raportimeve “të fortët” e Niklës kanë mohuar të kenë dijeni për atentatin, duke përjashtuar mundësinë se kanë konflikte me Gentian Bejtjen.
Ndërsa pritet që ky i fundit të merret në pyetje nga policia, për të parë nëse dëshmia e tij do të ndihmoj në hetime.
Tri armët kallashnikovë bashkë me gëzhojat e gjetura në vendngjarje janë dërguar në Laboratorin e Policisë Shkencore dhe pritet përgjigje nëse janë përdorur të trija për të qëlluar, si dhe nëse janë përdorur në ndonjë ngjarje tjetër kriminale.
Kujtojmë se ditën e djeshme vendi u trondit pak pas mesnate nga një atentat i ndodhur në Larushk të Krujës.
Autorët qëlluan drejt banesës së Gentian Bejtjes, dhe si pasojë mbeti i vrarë kunati i tij Ramazan Sino dhe të plagosur dy fëmijët e mitur, të cilët po zbrisnin nga automjeti për të hyrë në banesë. Objektiv i atentatit ishte Gentian Bejtja, emer i njohur për drejtësinë.
