Policia e Filipineve tha të martën se ka shpëtuar më shumë se 1000 shtetas, viktima të trafikimit të qenieve njerëzore.
Të trafikuarit kryesisht kineze, vietnameze, nga Singapori dhe Malajzia ishin mes personave që u gjetën kur policia bastisi ndërtesat në kryeqytet.
Sipas informacioneve, më shumë se 2,700 njerëz u arrestuan gjatë bastisjeve.
Shqetësimi ndërkombëtar është rritur mbi mashtrimet e internetit në rajonin e Azisë-Paqësorit, të drejtuara shpesh nga viktima të trafikimit të mashtruara ose të detyruara për të promovuar investime të rreme në kriptovaluta.
Policia tha se viktimat e trafikimit kishin pranuar punë të postuara në Facebook për të punuar në Filipine për lojërat online.
Shumë prej tyre u detyruan të punonin me turne 12-orëshe çdo ditë për 24,000 pesos (433 dollarë amerikanë) në muaj dhe u penguan të largoheshin nga kompleksi, tha ajo.
Shefi i policisë e përshkroi atë si bastisjen më të madhe kundër trafikimit në Filipine.
Në maj, autoritetet shpëtuan më shumë se një mijë njerëz nga disa vende aziatike, të cilët ishin trafikuar në Filipine, të mbajtur robër dhe të detyruar të kryenin mashtrime në internet.
Organizata Ndërkombëtare për Migracionin tha se viktimat shpesh futeshin në grackën e trafikantëve me perspektivën e “punëve më të mira me paga të larta dhe përfitime joshëse”.
Në raportin për trafikimin e qenieve njerëzore të vitit 2023, Departamenti i Shtetit i SHBA tha se Filipinet “nuk hetuan apo ndoqën me forcë krimet e trafikimit të punës që ndodhën brenda” vendit./Opinion.al
