Katër kandidatë për kryetarë bashkie të cilët humbën në zgjedhjet e 14 Majit, kanë pranuar humbjen por jo vetëm, i kanë dhënë dorën dhe kanë uruar kundërshtarin për fitoren, duke treguar kështu një shembull qytetarie.
Kandidati i koalicionit ‘Bashkë Fitojmë’’, Zef Hila në Vaun e Dejës uroi personalisht kundërshtarin e tij socialist që mori drejtimin e bashkisë. Ai i dha dorën Kristjan Shkrelit dhe i uroi që t’i shkojë mbarë në detyrën si kryebashkiak.
“Këtu është një garë e normalisht që dikush do të fitojë. Unë e uroj me gjithë shpirt. Fushata e numërimit shkoi shumë normal dhe normal që njëri do të fitojë. Të shkoftë mbarë!”, i tha Zef Hila, Shkrelit.
Në Mirditë kandidati i Partisë Socialiste, Ndrec Dedaj, kandidonte për një tjetër mandat në krye të bashkisë por më 14 Maj, qytetarët zgjodhën Albert Mëlyshin e koalicionit “Bashkë Fitojmë”.
Në përfundim të procesit të numërimit, Dedaj i uroi suksese kundërshtarit, përmes një statusi në rrjetet sociale.
“Garova dhe për një rrugëtim tjetër 4 vjeçar pasi kisha projekte e punë të tjera për të kryer, por ju e besuat votën tuaj për kundërshtarin tim në këto zgjedhje Albert Mëlyshin. I uroj Albertit suksese në detyrën e lartë të Kryetarit Bashkisë dhe bëftë më të mirën për Mirditën dhe ju të dashur qytetarët e mijë. Sovrani nuk gjykohet. Mirdita mbi të gjitha”, shkroi ai në rrjetet sociale.
E njëjta gjë ka ndodhur me kandidatin e koalicionit “Bashkë Fitojmë” në Gjirokastër, Dorjan Lani e ka pranuar rezultatin e 14 Majit. Lani i ka uruar suksese Flamur Golemit të PS-së.
“Në mesazhin tim, i kam uruar të gjitha të mirat dhe suksese në udhëheqjen e qytetit tonë të bukur, rivalit tim. Ne jemi një parti demokratike dhe vlerat tona janë të ndërtuara në bazë të respektimit të vullnetit të sovranit. Në fund të fundit, ndryshe nga garat sportive, në garën politike ka vetëm një fitues. Megjithatë, unë nuk do të ndaloj përpjekjet e mia për të ndihmuar Gjirokastrën dhe qytetarët e saj nëpërmjet punës time dhe angazhimit në shoqërinë civile”, tha Lani.
Edhe kandidati socialist në Kavajë, Redjan Krali, pranoi humbjen para se të përfundonte numërimi pasi kundërshtasri i tij ishte në avantazh dhe u largua nga ambientet e KZAZ-së.
Ai gjithashtu takoi të gjithë shtabin elektoral të kandidatit të koalicionit “Bashkë Fitojmë” dhe në fund i dha dorën kundërshtarit Fisnik Qosja.
