Sot bëhen 9 vite nga shpërthimi i tmerrshëm i fabrikës së demontimit të armëve në fshatin Gërdec të Vorës që shkaktoi tragjedi duke marrë 26 jetë njerëzish, duke gjymtuar shumë të tjerë dhe duke shkatërruar shtëpi e toka.
Por çfarë thonë sot banorët e Gërdecit, ata që u enden për vite dyerve të gjykatave për të marrë drejtësinë dhe për të dënuar autorët e krimit?
Përmes një komunikate për mediat ata shprehen se janë të zhgënyer më shumë nga politikanët se sa nga gjyqtarët. Ata akuzojnë Ramën se nuk po jep dëmshpërblimet, raporton Opinion.al
Në një e-mail të shpërndarë mëngjesin e sotëm nga avokati i tyre, Dorian Metalija, familjarët e viktimave thonë se “drejtësinë penale ja kemi lënë Gjykatës Evropiane për të Drejtat e Njeriut, ku kjo qeveri po mbron shkaktarët e tragjedisë”. Ata thonë se kemi besim se Strasburgu nuk do besojë qeverinë dhe do të jetë i qartë në vendimin e tij.
Përpos gjyqit penal është edhe problemi i dëmshpërblimeve. Banorët e Gërdecit shprehen se Rama premtoi se pas 23 qershorit 2013 gjërat do ishin ndryshe, por ato ishin fjalë të bukura sa për të marrë votat.
“E dimë që Kryeministri Rama do të përsërisë sot të njëjtin refren se fajin e paskan gjykatat dhe se po i shkon goja mbrapa duke thënë pse duhet vetingu. Por për gjyqet e dëmshpërblimeve nuk na e ka fajin gjykata”.
Banorët thonë se “gjyqtarët e Gjykatës Administrative janë treguar në lartësinë e duhur; si Gentian Hamitaj, Eriol Roshi, Emiljano Ruli, Erarbër Madhi, Selvie Gjocaj, Elda Vrioni, Bernina Kondi, Arbena Ahmeti, Gentian Medja, Nafije Hasko, Avni Sejdi, etj. që kanë dhënë vendimet e duhura dhe kanë njohur fajësinë e shtetit”. Ata thonë se “ne fituam edhe pse gjithë aparati shtetëror u angazhua për të rrëzuar këto padi në gjykatë”.
“Edhe Gjykata Administrative e Apelit, me trupën e kryesuar nga kryetari, Kastriot Selita, ka vendosur tashmë dy rastet e para të vulosjes së drejtësisë në favorin tonë, ndërkohë që qeveria nxitoi për t’u ankuar në Gjykatën e Lartë”, shkruajnë më tej ata.
“Nga ana tjetër, vetingun tonë nuk po e kalon dot Qeveria, e cila mbron shkaktarët e tragjedisë, vonon procedurat duke u ankuar pa fund dhe shtrembëron të vërtetën me të vetmin qëllim që të mohojë gishtin e shtetit në këtë tragjedi, duke mos ndryshuar asgjë nga linja e qeverisë së mëparshme. Sot është vertet vonë, por jo aq vonë sa Kryeministri Rama të mos gjejë dot pak forcë që të shfrytëzojë shancin e fundit dhe të kalojë Vetingun tonë. Sigurisht që ai ka të drejtë të ketë të njëjtin mendim si paraardhësi i tij, por të paktën t’i japë fund futjes së pengesave në rrugën e drejtësisë së pashmangshme dhe t’i hapë rrugë ekzekutimit të vendimeve gjyqësore”, thuhet në deklaratën e banorëve të Gërdecit në 9 vjetorin e tragjedisë.
/Opinion.al
*foto e viteve te kaluara te Rames ne Gerdec
