Për të nëntin vit radhazi Bulevardi para godinës së Kryeministrisë është mbushur me njerëz por ndryshe nga viti 2011 ku aty ishte organizuar një protestë, 8 vitet e tjera janë përkujtuar 4 viktimat e saj.
Përfaqësues të Partisë Socialiste, mbështetës të saj dhe familjarë të viktimave kanë vënë sot lule në vendet ku u vranë Aleks Nika, Ziver Veizi, Hekuran Deda dhe Faik Myrtaj.
Familjarët e viktimave janë shprehur se ende shpresojnë që personat përgjegjës për vrasjen e 4 protestuesve të vihen para drejtësisë.
Gjykata vlerësoi se vrasjet kanë ndodhur nga pakujdesia dhe dënoi ish-komandantin e Gardës, Ndrea Prendi me një vit burg, si dhe gardistin Agim Llupo me 3 vite. Ajo që nuk është përcaktuar ende është arma nga u qëllua Aleks Nika, sepse plumbi që kishte bërë rikoshet rezultoi mjaft i dëmtuar.
Më 21 janar 2011, Partia Socialiste, atëherë në opozitë, organizoi një protestë para kryeministrisë ku kërkonte dorëheqjen e kryeministrit Berisha. Protesta degradoi në dhunë dhe kaos në mes të cilit pjesëtarë të Gardës qëlluan me armë zjarri duke vrarë 4 protestues.
Kryeministri Rama nuk mundi të ishte në homazhet e sotme për shkak të angazhimeve në Ukrainë në krye të misionit të OSBE-së. /Opinion.al
