Mbrojtësi i Bayernit ka zgjedhur të flasë në “ORF” për spekulimet e kahershme – por të intensifikuara në muajt e fundit – për interesimin e mundshëm që Real Madridi ka për të. I pyetur për një kalim në La Liga, 24-vjeçari u përgjigj shkurtimisht: “Për mua është një nder i madh që emri im lidhet me një klub të tillë, por i kam vendosur vetes synime të mëdha për sezonin e ri dhe këto janë në Mynih.” Sipas së përditshmes spanjolle “AS”, klubi madrilen ka rritur ofertën për Alabën nga 65 në 80 milionë euro, por duket se austriaku minimumi edhe një sezon do tituj si bavarez.
Lojtari polivalent i Bayernit ka edhe një synim tjetër, që ka të bëjë me kombëtaren e Austrisë. Ai do shiritin e kapitenit. “Sigurisht që e shoh veten si kapiten. Mendoj se shpesh kam provuar se mund ta udhëheq skuadrën me lojën time”, – u shpreh ai. Pas Kampionatit Evropian në Francë, ish-kapiteni Christian Fuchs dha dorëheqjen nga kombëtarja. Julian Baumgartlinger nga Bayer Leverkusen ka shprehur dëshirën e tij për të qenë ai kapiteni i radhës, por edhe portieri Robert Almer është një alternativë. Avantazhi i Alabës është reputacioni i krijuar te rekordmenët.
