E keni vënë re kur dikush bie në qetësi në grupe bisedash në telefon, më konkretisht në WhatsApp dhe Messenger? Është aty i pranishëm mes jush, por zgjedh të mos flasë qoftë edhe një fjalë ose të përgjigjet vetëm në momentet kur e sheh më të përshtatshme për të reaguar.
Sipas një studimi, ka disa arsye të cilat mund të tingëllojnë “surprizuese” për ju dhe përmes tyre mund t’i identifikoni këta persona që rrinë gjatë gjithë kohës në heshtje.
Zgjedhin të vështrojnë në heshtje më shumë sesa të flasin
Një nga veçoritë më karakteristike të personave me tipar të qetë është vëzhgimi. Më shumë se sa për të bërë një reagim të menjëhershëm duke u përfshirë në biseda ndaj çdo mesazhi që u vjen në telefon, ata zgjedhin të bëjnë një hap pas dhe të ndjekin me kureshtje gjithçka që ndodh. Sipas psikologëve, ata tërhiqen nga përcjellja e emocioneve dhe dinamikat në tonet e përdorura nga persona të ndryshëm. Ndoshta kjo ndodh për t’u njohur me karakteret e tyre përpara se të marrë iniciativën që të shkruajnë.
Janë natyrë reflektuese dhe mendojnë shumë
Njerëzit e qetë, në këndvështrimin e psikologëve shquhen për reagime të rralla me impulsivitet në mënyrën se si ata komunikojnë. Ata ndalen dhe mendojnë, ndonjëherë shumë gjatë, mbi fjalët që duhet të përzgjedhin ose kur marrin mesazhin. Kjo është dhe arsyeja kryesore përse ata as nuk replikojnë menjëherë apo zgjedhin emoji për të shprehur atë që mendojnë dhe ndjejnë.
Me fjalë të tjera, kjo sjellje mund të manifestohet thjesht si “seen”, një mesazhë i parë nga personi i cili ka preferuar të mos kthejë përgjigje të menjëhershme, por t’i lë gjërat në pritje.
Kujtojmë se më herët, bashkëshortja e ish-Presidentit amerikan, Michelle Obama u shpreh se një karakteristikë e tillë e personave të qetë mund të jetë një sinjal se ata përgatiten në çdo situatë për të dhënë një përgjigje sa më të plotë.
Janë dëgjues më të mirë
Mendoni për një çast si është ta gjesh veten në një hapësirë bisede ku të gjithë flasin, por askush nuk është duke e dëgjuar. Si do ndiheshit ju nëse do përballeshit me këtë situatë, teksa përcillni një mesazh zanor në rastin më konkret dhe askush mos t’ia vërë veshin asgjëje çfarë keni thënë? Kjo sepse është shumë e thjeshtë për t’u kapur në befasi dhe të kthehesh në “meme” dhe burim provokimesh, duke u bërë objekt bisede.
Fillimisht ata priren të kuptojnë thelbin e kontekstit të mesazhit të përcjellë, e më pas analizojnë tonin e përdorur. Këto tipare dalluese të çojnë menjëherë në dilemën nëse është çasti për të qëndruar indiferent apo për të reaguar që të zgjidhësh çështjen.
Vlerësojnë marrëdhëniet që janë të vërteta
Ndryshe nga të tjerë, ata priren të shkëmbejnë mesazhe që ia vlejnë për t’u lexuar ose dëgjuar. Thënë në një gjuhë më të kuptueshme, ata bëhen më aktivë vetëm në raste kur bisedat marrin përmasa serioze duke u përkushtuar me të gjithë energjinë e tyre.
Çdo lëvizje e tyre është strategji
Sheh befas që dikush ka shkruar pas një heshtje të gjatë dhe shtangesh. Kjo sepse personi në fjalë ka zgjedhur të ndërhyjë në bisedë përmes strategjisë të tij, për të shmangur çdo “dramë” ose diskutime të panevojshme. Këtë psikologët e quajnë natyra e njerëzve selektivë të cilët dinë kujt, kur dhe si ta delegojnë një mesazh në grupe WhatsApp-i. Kjo mund t’i japë një tjetër rrjedhë bisedës, ndoshta edhe për të ‘karikuar’ të gjithë pjesëtarët e tjerë që të ndajnë mendime të ndryshme.
Gjejnë rehati në “vetminë” e tyre
Zhurmat e tepërta mund të kthehen në burim shqetësimi për persona që e lakmojnë qetësinë dhe zgjedhin të distancohen duke qëndruar në vetmi. Kjo sepse bisedat bëhen të mbingarkuara dhe nuk kërkojnë të shkarkojnë të gjithë energjinë për të marrë pjesë në biseda të cilat mund të mos jenë aq serioze në përmbajtjen që ofrojnë.
Këta individë e çmojnë shumë qetësinë dhe në vend që të përfshihen në grupe bisedash, lënë telefonin mënjanë duke u siguruar që të mos vijë asnjë thirrje me zë dhe qëndrojnë në heshtje për të rifutuar energjinë. Këtë psikologët e quajnë si mirëqenie mendore.
Janë thellësisht të vetëdijshëm në atë çfarë bëjnë
Personat që kanë një natyrë të tillë kujdesen për çdo emocion që shfaqin në çdo grup bisedash ku ata ndodhen. Psikologët thonë se ata janë të vetëdijshëm për kufijtë që kanë dhe nuk duan t’i cenojnë, as për veten dhe as për të tjerët. Kështu e shprehin anën emocionale, edhe pse në bisedat online nuk e bëjnë kaq lehtë. Injorimi i debateve i identifikon ata më së miri në këtë aspekt.
Janë elastikë në përcjelljen e emocioneve
Nuk ndikohen aspak nga mendimet e të tjerëve sado përpiqen që këta të fundit të ushtrojnë presion. Nëse biseda për ta ka përfunduar, është e kotë të nxisësh justifikime. Në rastet më kaotike kur një bisedë përfshihet nga emocionet negative, ata janë të aftë të shkëputen në heshtje duke mos lënë aspak hapësirë për diskutim.
