Të paktën 8 persona kanë mbetur të vrarë, ndërsa rreth 3 mijë të tjerë janë plagosur në Liban pasditen e kësaj të marte, si pasojë e shpërthimit të pajisjeve të dorës të komunikimit, të përdorura nga Hezbollahu.
Shpërthimet ndodhën në Bejrutin jugor dhe në disa zona të tjera të vendit.
Ministri i informacionit i Libanit Ziad Makary tha se qeveria dënoi shpërthimin e pajisjeve si një “agresion izraelit”. Hezbollahu gjithashtu fajësoi Izraelin për shpërthimet dhe tha se do të merrte “dënimin e tij të drejtë”.
Izraeli dhe Hezbollahu i mbështetur nga Irani janë përfshirë në luftë ndërkufitare që nga shpërthimi i luftës në Gaza tetorin e kaluar, në përshkallëzimin më të keq në vite.
Shefi i Hezbollahut, Sayyed Hassan Nasrallah nuk u lëndua nga shpërthimet, tha grupi.
Vala e shpërthimeve zgjati rreth një orë pas shpërthimeve fillestare, të cilat ndodhën rreth orës 15:45.
Ministria e Jashtme libaneze i përshkroi shpërthimet si një “përshkallëzim të rrezikshëm dhe të qëllimshëm izraelit”, i cili tha se ishte “shoqëruar nga kërcënimet izraelite për të zgjeruar luftën ndaj Libanit në një shkallë të gjerë”.
Forcat libaneze të sigurisë së brendshme thanë se një numër i pajisjeve të komunikimit me valë u shpërthyen në të gjithë Libanin, veçanërisht në periferitë jugore të Bejrutit, një bastion i Hezbollahut.
Ministri libanez i Shëndetësisë, Firass Abiad tha se 2,750 njerëz ishin plagosur në shpërthimet, 200 prej tyre në gjendje kritike./Opinion.al
