Një grup prej shtatë deputetësh kërkojnë interpelancë urgjente me kryeministrin Edi Rama për mos-hapjen e negociatave të Shqipërisë me BE-në. Firmëtarët janë: Mimoza Hafizi, Dashamir Shehi, Nard Ndoka, Ben Blushi, Astrit Patozi, Vangjel Dule, Agron Duka.
Shkak për këtë interpelancë urgjente është shqetësimi i tyre për shtyrjen pa afat të një date për hapjen e negociatave. Ndërkohë do të jetë deputeti Ben Blushi i cili do të shprehet në emër të këtij grupi deputetësh.
Kërkesa e plotë dërguar kreu të Kuvendit, Ilir Meta
Një grup deputetësh të Kuvendit të Shqipërisë përfaqësues të forcave të ndryshme politike, bazuar në nenet 96 dhe 97 të Rregullores së Kuvendit kërkojnë zhvillimin e një interpelance urgjente lidhur me çështjen e hapjes së negociatave për anëtarësim vendit tonë në BE
Para pak ditësh Këshilli i Ministrave të BE nuk vendosi asnjë datë për hapjen e negociatave, për shkak të mospërmbushjes së 5 kritereve të përcaktuara nga të gjitha dokumentet lidhur me vendin tonë. Ne jemi të shqetësuar se çështja e integrimit shtyhet në afat të panjohur, duke krijuar mungesë shprese, pasiguri dhe cënon imazhin e Shqipërisë.
Hapja e negociatave me BE është çështje prioritare e politikës sonë, prandaj ne kërkojmë interpelancë urgjente me kryeministrin e vendit lidhur me veprimtarinë e tij dhe të qeverisë në këtë proces.
Kërkojmë që kjo interpelancë urgjente të parashikohet sipas neneve 96 dhe 97 të rregullores së Kuvendit.
Deputeti që do të shprehet në seancë në emër të grupt tonë, sipas pikës 96.5 të Rregullorës së Kuvendit do të jetë Ben Blushi.
