Arbër Çekaj i cili akuzohet për trafikimin e 613 kg kokaine nga Kolumbia në Shqipëri, ka dal ditën e sotme para trupit gjykues të Gjykatës për Krimet e Rënda.
Së bashku me Çekajn, Krimet e Rënda çelën shqyrtimin gjyqësor edhe për dy persona të tjerë të përfshirë në këtë ngjarje, Armando Pezakun dhe Donaldo Lushajn.
Në seancën e sotme, Çekaj paraqitej për herë të parë para gjykatës, pasi u ekstradua nga Gjermania. Në kërkesën për gjykim prokurori tha se Çekaj kishte rolin e garantorit të transportit të kokainës.
Ndërsa dy të bashkëpandehurit e tjerë ishin të besuar të tij dhe kishin si rol tërheqjen e saj nga Porti i Durrësit. Gjatë seancës, Çekaj si dhe dy bashkëpunëtorët e tjerë i kanë kërkuar Gjykatës gjykim të shkurtuar.
Ndërkohë, Gjykata për Krime të Rënda, pasi u tërhoq për të marrë vendim, pranoi kërkesën e të pandehurve për gjykim të shkurtuar dhe ne datën 15 tetor, pritet që të lexohen konkluzionet përfundimtare të Prokurorisë./ Opinion.al E.Xh.
