Një punonjës policie është arrestuar së bashku me një rrjet të trafikimit të qënieve njerëzore. Shërbimi për Çështjet e Brendshme, në bashkëpunim me Prokurorinë e Rrethit Gjyqsor Korçë, kanë arritur të ndalojnë rrjetin në fjalë.
SHÇBA kishte regjistruar një procedim penal mbi bazën e informacioneve që kishte siguruar për kalimin e shtetasve shqiptare dhe të huaj, përmes kufirit të gjelbër drejt Greqisë e Maqedonisë në mënyrë ilegale, mes tyre me destinacion final Francën për azil kërkim.
Kapja e tyre është bërë pas një hetimi special, ku u bë e mundur identifikimi dhe dokumentimi i tyre.
Ditën e sotme, strukturat e SHÇBA kanë arrestuar në flagrancë: Artan Ceno, 44 vjeç, punonjës policie me detyrë kontrollor në pikën e Kalimit Kufitar Kapshticë, Korçë; Majlinda Seiti, 52 vjeçe, lindur e banuese në Korçë; Adriano Kocoli, 52 vjeç, lindur e banues në Korçë.
Kundrejt pagesave që varionin nga 6 në 7 mijë euro për person, grupi i dyshuar, krijonte kushtet për të kaluar drejt vendit fqinj, qytetarë të ndryshëm nga Shqipëria dhe Kosova, në kundërshtim me ligjin, me destinacion Francën për azil kërkim.
Në disa raste, në bashkëpunim me punonjësin e policisë tashmë të arrestuar, kanë kaluar nga kufiri i gjelbër, fëmijë të mitur, të cilët më pas kërkonin azil si të pashoqëruar, në vende të ndryshme të Europës.
Hetimi po vijon për zbulimin e personave të tjerë të implikuar.
