Presidenti Ilir Meta këtë të mërkurë ka publikuar disa të dhëna nga Instituti për Studime Ekonomike Ndërkombëtare i Vjenës, i cili bën me dije se fenomeni i shpopullimit në Shqipëri, gjatë viteve të fundit është përkeqësuar sidomos me largimin e grupmoshave 20-24 vjeç.
Kreu i Shtetit shkruan se largimi i trurit dhe i rinisë është një plagë e madhe për vendin teksa bën thirrje se ky fenomen duhet ndalur sa më parë. Sipas Metës, të rinjve u duhet ofruar më shumë shpresë, alternativa edukimi dhe punësimi, ndërsa të arsimuarve më shumë shanse të barabarta, vlerësim meritokracie dhe vende pune.
“Largimi i trurit dhe i rinisë është një plagë e madhe për vendin. Një tjetër institucion prestigjoz, Instituti për Studime Ekonomike Ndërkombëtare i Vjenës, bën me dije se fenomeni i shpopullimit në Shqipëri, gjatë viteve të fundit është përkeqësuar sidomos me largimin e grupmoshave 20-24 vjeç. Studimi vëren se nga 105 mijë qytetarë që ikin nga Shqipëria, 40,700 persona janë të arsimuar ose 40 për qind e totalit. Largimi i trurit dhe i forcave të reja dhe më krijuese të shoqërisë duhet ndalur sa më parë. Të rinjve tanë u duhen ofruar më shumë shpresë, alternativa edukimi dhe punësimi, ndërsa të arsimuarve më shumë shanse të barabarta, vlerësim meritokracie dhe vende pune, ku të shfaqin talentin dhe potencialin e tyre intelektual.
Shqipëria ka nevojë për “brain gain” dhe jo “brain drain”!KOHA PËR TË NDALUR SHPOPULLIMIN ËSHTË TANI!”, shkruan Meta./Opinion.al
