4 aksidente janë regjistruar brenda pak orësh në vendin tonë. Si pasojë e aksidenteve mbetën të plagosur 18 persona.
Aksidenti i parë u regjistrua në Rrugën e Kombit, ku 5 anëtarët e një familje u plagosën, pasi makina e tyre me targa serbe u përplas me trafik ndarësen.
Familja ishte nisur për pushime, por si pasojë e aksidentit përfundoi në spitalin e Lezhës për të marrë ndihmë mjekësore.
Ndërsa pak minuta më vonë një tjetër aksident ndodhi në Fier. Policia informoi se rreth orës 07:30 të mëngjesit në vendin e quajtur “Safari park” në Fier u përplasën dy automjete, ndërsa mbetën të lënduar 10 persona.
Më pas u raportua për një tjetër aksident i ndodhur në Shkopet ku 2 persona mbetën të plagosur.
Aksidenti i fundit u raportua në Korçë, ku një automjet përplasi një motor duke lënë të plagosur drejtuesin e këtij të fundit.
Nga 4 aksidentet e ndodhura, nga veriu në jug nuk u raportua për viktima, por dyshohet se shkak kryesor i aksidenteve ishte lagështira në rrugë dhe shpejtësia tejet normave të lejuara./Opinion.al
