Presidenti në largim i Shteteve të Bashkuara, Barack Obama, vetëm tre ditë para mbarimit të mandatit ka vendosur të falë, ose të ulë dënimin e më shumë se 200 të burgosurve.
Ky njoftim u dha nga Shtëpia e Bardhë, ditën e djeshme.
Një prej të dënuarve që u është falur plotësisht dënimi është edhe Chelsea Manning, ish analiste e ushtrisë amerikanë, e cila ka bashkëpunuar më Wikileaks duke u dhënë atyre informacione shtetërore.
Ajo u dënuar me 35 vite burg, ndërsa tani, sipas urdhrit të Obamës, 29 vjeçarja do të lirohet më 17 maj.
Mediet amerikane shkruajnë se lirimi i Manning lehtëson edhe Departamentin e Mbrojtjes nga burgosja e saj. Në kontradiktë me këtë falje, presidenti duket se nuk ka konsideruar lëshime për Edward Snowden, analistin e NSA-së që bëri të njëjtën gjë si Manning, por ia mbathi në Rusi për t’i shpëtuar drejtësisë.
Zyrtarë të Shtëpisë së Bardhë thanë se Manning u gjykua dhe u burgos në SHBA, duke kaluar proceset ligjore. Ndërsa Snowden ia mbathi për t’u mbrojtur në krahët e një kundërshtari, që së fundmi bëri përpjekje për të dëmtuar besimin te demokracia amerikane./ opinion.al
