Drejtori i Urgjencës Kombëtare, Skënder Brataj, është shprehur se deri më tani në Shqipëri nuk ka asnjë rast të konfirmuar me koronavirus.
Gjatë një interviste televizive, Brataj tha se këto ditë ka pasur rreth 35 raste të dyshuara, të cilëve iu është bërë analiza e koronavirusit dhe kanë rezultuar negativë.
Teksa theksoi se nuk ke vend për panik, Drejtori i Urgjencës Kombëtare këshilloi qytetarët që të përdorin sa më shumë dezinfektues, pasi sipas tij, shkatërrojnë viruset.
“Nuk ka në Shqipëri raste. Nëse do të ketë, do rritet niveli i masave për t’iu përballur gjendjes. Dje kishim mbi 1600 thirrje nga qytetarët, ka rritje të panikut. Ka një grup mjekësh që përgjigjen në numrin 127, që këshillojnë për koronavirusin dhe çdo shqetësim tjetër. Sa i përket rasteve, kemi pasur rreth 35 që i kemi skeduar këto ditë. Ai ka shkuar te spitali infektiv, ku janë bërë analizat. Ne e bëjmë në Shqipëri analizën e koronavirusit, tek ISHP, dhe brenda ditës del përgjigjja, brenda 8 orësh.”-tha Brataj./ Opinion.al
