Kreu i Partisë Demokratike, Lulzim Basha ka uruar Lidhjen Demokratike të Kosovës me rastin e 30 vjetorit të themelimit të saj.
Në urimin e tij Basha shkruan se LDK është pjesë e krenarisë kombëtare dhe themeluesi i saj Ibrahim Rugova “shembull largpamësie, emancipimi, kurajo dhe qëndrese.”
“Sot në këtë 30 vjetor të themelimit, personalisht dhe në emër të Partisë Demokratike të Shqipërisë, dua nga zemra ti uroj mbarësi e suksese simotrës tonë Lidhjes Demokratike të Kosovës, drejtuesve dhe mbështetësve të saj.
LDK lindi në një kohë të errët pushtimi, si shpresë e shqiptarëve të Kosovës për çlirim kombëtar dhe demokraci.
Në themel të njërës prej arritjeve më të mëdha të historisë së shqiptarëve, në themelet e Pavarësisë së Kosovës qëndron shpirti, djersa dhe gjaku i drejtuesve, mbështetësve dhe atyre që besuan te LDK. Historia e LDK është histori e krenarisë së Kosovës, është pjesë e krenarisë kombëtare.
Veçanërisht në këtë ditë, është çasti të kujtojmë me nderim themeluesin e LDK, udhëheqësin e shpirtit të Kosovës së pavarur Presidentin Ibrahim Rrugova, si shembull largpamësie, emancipimi, kurajo dhe qëndrese.
Drejtuesve të LDK bashkë me urimin, dua ti garantoj se te Partia Demokratike e Shqipërisë, do të gjejnë përherë mbështetjen vëllazërore, partneren e qëndrueshme dhe të palëkundur të Kosovës së pavarur dhe sovrane dhe të zhvilluar.
Sfidat i kemi përpara por bashkimi i forcave, vizionit dhe vullneteve tona, do të bëjë të mundur ti përmbushim me sukses ato në shërbimin më të mirë të interesave tona kombëtare.
Gëzuar 30 vjetorin të dashur vëllezër dhe motra të LDK!
Zoti e bekoftë Kosovën, Shqipërinë, dhe shqiptarët kudo ku janë!”
Lidhja Demokratike e Kosovës doli e dyta në zgjedhjet parlamentare të 6 tetorit në Kosovë pas Vetëvendosjes. Bisedimet e tyre për një koalicion qeverisës ende nuk janë konkretizuar pasi mes partive ka ende mosmarrëveshje në lidhje me postin e Presidentit të Republikës dhe ndarjes së ministrive. /Opinion.al
