Dy efektivë të policisë së Shtetit janë vënë në hetim administrativ nga ShÇBA nën dyshimet se kanë dekonspiruar operacionin që çoi në kapjen e 3.4 milionë euro në portin e Durrësit.
Ndërkohë të arrestuarit vijojnë të mohojnë faktin se kanë pasur dijeni për paratë. Gjatë marrjes në pyetje, ata kanë deklaruar se kanë pasur dijeni vetëm për makinat.
Alban Mollaymeri, pronar i një servisi në periferi të Tiranës, ka deklaruar se: U kontaktova nga Alfred Vladi për të blerë disa automjete për kompaninë e tij. Kompania e Vladit ështe hapur në maj të këtij viti.
Policia ka organizuar disa operacione për kapjen e Alfred dhe Elvis Vladit, të dy nga Peshkopia, të cilët janë personat që sipas policisë kanë porositur ngarkesën me euro. Por deri tani nuk ka pasur asnjë rezultat për rënien në gjurmë të tyre.
Ndërkohë paratë e sekuestruara, 3.366.800 euro dhe 80,000 franga zvicerane janë dërguar në Laboratorin Kriminalistik për ekspertizë.
Për sasinë e eurove ndodhen pas hekurave dhe Edi dhe Klevis Lika, babë e bir.
Edi Lika ka në pronësi një servis në autostradën Tiranë- Durrës, ndërsa së fundmi e kishte zgjeruar aktivitetin e tij në transport ndërkombëtar mjetesh.
I biri, Klevis Lika kishte nisur punë si shofer shoqërues.
Ndërsa Agim Ceka 61-vjeç ishte shoferi kryesor i mjetit ‘Bizark’ që tranportonte 9 automjetet nga Belgjika në Shqipëri.
