Në ceremoninë e 25-vjetorit të themelimit të Partisë Socialiste, kreu i saj Edi Rama ka folur për “gabime” dhe “mësime”. Rama e fokusoi fjalimin e tij tek të zhgënjyerit, ata brenda PS dhe ata në radhët e votuesve të saj.
“Rruga e ndryshimit i ndan, i turbullon njerëzit. Kam mësuar se Kryeministër nuk të bën karrigia, dhe nuk mjafton që të japësh urdhra dhe gjërat të bëhen. Këtë nuk ua mëson dot lehtë, në mos nuk ua mëson dot fare të tjerëve”, tha Rama.
Kreu i PS-së u tregu i vetëdijshëm për ekzistencën e të zhgënjyerve si brenda PS-së ashtu edhe te votuesit e saj. Por ndryshe nga ata brenda partisë, Rama tha se qytetarët e thjeshtë janë më të duruar.
“Nuk mund t’i kënaqësh të gjithë gjatë gjithë kohës, aq më të tepër që ka disa njerëz që nuk mund ti kënaqësh kurrë. Gabimet tona nuk janë të qëllimshme. Njerëzit e zakonshëm tregojnë durim. Ka ende shumë për të bërë, nuk jemi të përsosur kemi bërë gabimet tona”, u shpreh Kryeministri.
Pavarësisht të “zhgënjyerve”, Rama tha se PS po rritet “me ndihmën e kundërshtarëve tanë”, duke shtuar se, “nuk e di nëse kam mësuar sa duhet dhe si duhet”.
Gjatë fjalës së tij, Rama tha se: “PS është një shkollë e ngritur mbi parimin se askush nuk mund të ketë të drejtë për çdo gjë dhe gjithmonë. Këtu kam mësuar se pavarësisht se kush je, i vetëm mund të arrish shumë pak dhe jo gjithmonë ajo që mund të arrish është një mundësi e përbashkët”.
Ceremonia festive u zhvillua në lulishten pas selisë së PS-së dhe nisi rreth orës 19:00. Kryeministri Rama mbërriti në festën e PS rreth orës 19:15. Po kështu, në festë është i pranishëm edhe Tritan Shehu nga PD-ja.
Po kështu, në festë do të shfaqet një dokumentar disaminutësh, ku do të tregohet përmes pamjeve filmike historia 25-vjeçare e kësaj partie që nga 12 qershori i 1991-shit, kur kongresi i saj zgjodhi Fatos Nanon kryetar e deri në ditët e sotme, kur socialistët qeverisin vendin.
Nuk mungojnë në këtë dokumentar momentet më pikante të përballjes së tyre me pushtetin e Partisë Demokratike, kur Sali Berisha ka qenë një herë President e më pas Kryeministër.
Festa organizohet në formën e një kokteji dhe në të janë ftuar anëtarët e Kryesisë, Sekretariatit, Asamblesë, deputetë të PS-së dhe kryetarët e bashkive të mëdha në këto 25 vite.
Ftesa i ka shkuar edhe kryetarit të parë të kësaj partie, Fatos Nanos, por nuk ka patur konfirmim nëse do të vijë./Panorama
