Në 24 vjetorin e çlirimit të Kosovës, kryeministri Edi Rama ka bërë thirrje se pikërisht dita e sotme është një ditë për të reflektuar thellë që Kosova të dalë nga qorrsokaku ku e ka futur grindja absurde me aleatët. Rama ka vënë theksin se pa aleatët nuk do kishte sot as Republikë të Kosovës dhe as liri e demokraci për shqiptarët.
Më tej, ai shkruan se dialogu dhe jo policët, idetë dhe jo propaganda janë rruga e duhur për të shtensionuar situatën në Veri.
“Si sot e gati çerek shekulli më parë, hyrja e NATO-s në Kosovë u rikujton të gjithëve, se pa aleatët strategjikë të shqiptarëve, miq të mirë në ditët më të këqija, s’do të kishte as Republikë të Kosovës, as liri e demokraci për shqiptarët në Kosovë! Zoti i bekoftë aleatët tanë!
Prandaj bash sot është dita për të reflektuar thellë e për ta nxjerrë Kosovën nga qorrsokaku ku e ka futur grindja absurde me aleatët! Kosova duhet të dalë patjetër prej qorrsokakut me dialog jo me policë, me ide konkrete jo me propagandë, me miq të mirë jo me keqtrajtim të miqve”, shkruan Rama.
