Më 10 Qershor në New York është mbajtur parada më e rëndësishme e shqiptarëve që organizohet çdo vit në këtë muaj. E kthyer në një traditë mijëra shqiptarë të veshur kuqezi marshuan në rrugët e qytetit.
I pranishëm në paradë ka qenë edhe një qytetar me origjinë nga Shkreli i Malësisë së Madhe, i cili prej 22 vitesh jeton dhe punon në SHBA.
Pasioni për makinat e vjetra e kishte sjellë atë në paradë me një makinë “Retro”, treksa tregoi për gazetarin Blendi Fevziu jetën në Amerikë dhe dallimet me Shqipërinë.
Blendi Fevziu: Është pjesa e makinës “Retro” dhe përpara kemi motoristët, të cilët janë pjesë më interesante.
Fevziu-drejtuesit të makinës “Retro”: A të hipi me ty?
Qytetari: Po patjetër.
Blendi Fevziu: Më rehat se kaq nuk kam qenë asnjëherë. I cilit vit është makina?
Qytetari: 1929.
Blendi Fevziu: Ku e ke blerë makinën?
Qytetari: Këtu në New York.
Blendi Fevziu: Nga je?
Qytetari: Nga Shkreli i Malësisë së Madhe. Ka 1 vit që e kam blerë këtë makinën. Kam edhe makinë të re, por kam qejf këtë të vjetrën.
Blendi Fevziu: Edhe i paske të dyja, edhe flamurin shqiptar, edhe atë amerikan.
Qytetari: Po, të dyja, Zoti i bekoftë të dyja. Kam 22 vjet në Amerikë. Kma ardhur në Amerikë për një jetë më të mirë.
Blendi Fevziu: A është më e mirë jeta në Amerikë?
Qytetari: Po, më e mirë. Si dita me natën me Shqipërinë. Më e mirë do të ishte jeta atje po të kishim punë, por kur nuk ke punë… Shkoj për për çdo verë në Shqipëri, edhe 2 herë në vjet. Më pëlqen sepse është vendi yt.
Kjo paradë i dedikohet lidhjes shqiptare të Prizrenit dhe është edicioni i 15 që organizohet në New York.
