Kina dhe India kanë akuzuar njëri-tjetrin për provokimin e përplasjes ku mbetën të paktën 20 ushtarë indiane të vrarë.
Mëngjesin e të martës, ushtria indiane tha që tre ushtarë të saj kishin vdekur në një përleshje me forcat kineze në Ladakh, në rajonin e Kashmirit.
Më vonë autoritetet thanë se “17 trupa indiane që u plagosën rëndë në linjën e detyrës” vdiqën nga dëmtimet e marra, duke çuar “totalin e atyre që u vranë në 20”.
Beteja e së martës raportohet se u zhvillua me gurë dhe shkopinj. Të dy palët këmbëngulin se asnjë plumb nuk është qëlluar në katër dekada, dhe ushtria indiane tha të martën se “nuk pati të shtëna” në këtë përleshje. Deklarata vazhdon të theksojë se ushtarët e plagosur ishin gjithashtu “të ekspozuar ndaj temperaturave nën-zero në terrenin e lartë”.
Se si një përplasje ku nuk ka patur shkëmbim zjarri mund të shkaktojë kaq viktima është e paqartë, por mediat lokale raportojnë se ushtarët indiane ishin “rrahur për vdekje”.
Ministria e punëve të jashtme të Indisë akuzoi Kinën për shkeljen e një marrëveshje të arritur javën e kaluar për të respektuar Linjën e Kontrollit Aktual (vija kufitare).
Zëdhënësi i Ministrisë së Jashtme Anurag Srivastava tha se përplasja lindi nga “një përpjekje e palës kineze për të ndryshuar në mënyrë të njëanshme status-quon” në kufi.
Kina nuk konfirmoi numrin e viktimave, por akuzoi Indinë që kaloi kufirin në anën kineze.
“Arroganca dhe pamëshirshmëria e palës indiane është arsyeja kryesore për tensionet e vazhdueshme përgjatë kufirit Kinë-Indi,” shkruan një editorial në gazetën shtetërore kineze Global Times të Mërkurën.
Kryeministri indian Narendra Modi ende nuk e ka adresuar publikisht çështjen, diçka që u theksua nga Rahul Gandhi, ish-drejtuesi i partisë opozitare Kongresi Kombëtar Indian.
Kombet e Bashkuara kanë nxitur të dy palët “të kufizohen maksimalisht”.
“Ne marrim shënime pozitive të raporteve që të dy vendet janë angazhuar për të ç’tensionuar situatën,” tha zëdhënësi i asociuar i OKB Eri Kaneko.
Një zëdhënës i Departamentit të Shtetit, ndërkohë, tha që po “monitoronte nga afër” situatën dhe se SHBA mbështesin një zgjidhje paqësore.
Vdekjet e raportuara të martën besohet të jenë të parat në dekada në një konfrontim midis dy fuqive. Ata kanë luftuar vetëm një luftë deri më tani, në vitin 1962, kur India pësoi një humbje të rëndë.
Në maj, dhjetëra ushtarë indiane dhe kinezë shkëmbyen goditje fizike në një përleshje në kufi në shtetin verior-lindor të Sikkim. Në vitin 2017, të dy vendet u përplasën në këtë rajon pasi Kina u përpoq të zgjasë një rrugë kufitare përmes një pllaje e cila pretendohej nga të dyja palët.
Kina dhe India janë të ndara nga Linja e Demarkuar dobët e Kontrollit Aktual. Lumenjtë, liqenet dhe reshjet e dëborës bëjnë që vija e kufirit të zhvendoset, duke provokuar konfrontim.
Ekzistojnë disa arsye pse tensionet rriten tani – por qëllimet strategjike konkurruese janë në themel, dhe të dy palët fajësojnë njëra-tjetrën.
India ka ndërtuar një rrugë të re në atë që ekspertët thonë se është zona më e largët dhe më e prekshme përgjatë kufirit në Ladakh. Dhe vendimi i Indisë për të ngritur infrastrukturën duket se e ka zemëruar Pekinin.
Rruga mund të rrisë aftësinë e Delhit për të lëvizur njerëzit dhe materialet me shpejtësi në rast të një konflikti.
India gjithashtu pretendon një pjesë të Kashmirit – një rajon etnikisht i larmishëm i Himalajas që mbulon rreth 140,000 km2 – në konfliktin e saj me Pakistanin. / Opinion.al
