Detaje të reja kanë nisur të zbardhen lidhur me sekuestrimin e rreth 2 milionë eurove në një mjet brenda tragetit që mbërriti nga Bari në portin e Durrësit. Mediat raportojnë se kamioni me targë TR 2046 U, kishte dalë 4 ditë më parë nga porti i Durrësit për të udhëtuar drejt barit. Ai ishte rikthyer mbrëmjen e së premtes rreth orës 1:30 pas mesnatës. Kamioni kryente shpesh linjën Durrës-Bari-Durrës dhe transportonte nga Italia drejt Shqipërisë lëndë të parë për prodhimin e këpucëve, që përdorej nga fasoneritë.
Zbulimi nga skaneri është bërë në orën 01:30 gjatë një kontrolli rutinë, ndërsa policia ka ndaluar tashmë shoferin e kamionit, shtetasin A.Th. 54-vjeç nga Tirana. Sikurse raportohet në media, shoferi i kamionit ka mohuar të ketë patur dijeni për shumën e parave në mjetin e tij.
Ndërkohë që nuk ka ende të dhëna mbi poseduesit e vlerës prej afro 2 milionë eurosh, është bërë më dije se kamioni ku ato u gjetën është në pronësi të kompanisë JA-ADA shpk, me pronar shtetasin A.K, që bënte transport edhe për palë të treta./Opinion.al
