Ditën e djeshme policia Kufitare Kapshticë sekuestroi një sasi prej 195 kilogramësh kanabis që po tentohej të kalohej drejt Greqisë me kamion.
Oficerët e policisë kanë përzgjedhur për kontroll të detajuar në vijë të dytë mjetin kamion tip “Iveco”, me drejtues shtetasin S. V., 54 vjeç, banues në Tiranë, i cili kishte si destinacion Greqinë.
Kontrolli ka vijuar më pas me procesin e skanimit të kryer nga Dogana, ku u shfaqën dyshime se mbi karrocerinë e mjetit mund të ishte fshehur lëndë narkotike. Konkretisht në sipërfaqen e saj u gjet një sasi prej 195 kg kanabis, e cila u sekuestrua. Drejtuesi i kamionit (i dënuar më parë për veprën “Dhuna në familje”) u arrestua në kushtet e flagrancës.
Pas shoqërimit të tij në polici u bë zbardhja, dokumentimi i plotë i skemës së tentativës së trafikimit ndërkombëtar të narkotikëve, identifikimi dhe kapja e personave të tjerë të implikuar në këtë ngjarje.
Konkretish u arrestuan 3 persona dhe një u shpall në kërkim.
Materialet në ngarkim të tyre i kaluan Prokurorisë të Rrethit Gjyqësor Korçë. /Opinion.al
