Kryetari i Bashkisë së Tiranës, ka bërë thirrje për protesta para Gjykatës së Apelit Administrativ, ku pritet të shqyrtohet kërkesa për prishjen e pallatit 17-katësh, pranë digës së liqenit artificial të Tiranës.
Veliaj bën thirrje që deri para orës 11:00 kohë kur nis gjyqi të ndryshohet trupa që ka në dorë çështjen pasi sipas tij ata janë familjarë të ndërtuesve.
“Në fushatë premtova se do kërkoj revokimin e lejes te Liqeni sipas raportit të Bordit të Digave për rrezikun aty. Sot në orën 11:00 zhvillohet seanca gjyqësore ku Bashkia kërkon këtë anullim.
Por gjyqtarë nuk mund të jenë familjarët e ndërtuesve, kjo është E PALIGJSHME DHE FYESE. Nëse para orës 11:00 nuk hiqen familjarët e betonit nga trupi gjykues, do jem në proteste me qytetarët para Gjykatës së Apelit Administrativ (ish Ministria e Mjedisit, në Rrugën e Durrësit). Nuk është kërcënim, është premtim.
Gjykatat nuk mund të jenë tender për ofertën më të lartë! Të gjithë në 11 para gjykatës për REFORMË NË DREJTËSI që të kemi DREJTËSI NË QYTET.”-shkruan Veliaj.
