Ish-presidenti meksikan, Enrique Peña Nieto akuzohet se ka marrë një ryshfet 100 milionë dollarësh nga “mbreti” i karteleve të drogës, Joaquin Guzman, i njohur edhe si “El Chapo”, sipas një dëshmitari në gjyqin që po zhvillohet ndaj tij në SHBA.
Guzman akuzohet si organizatori i kartelit famëkeq të drogës, atij të Sinaloas, që konsiderohet prej prokurorëve si furnizuesi më i madh me drogë i tregut në Shtetet e Bashkuara.
Enrique Peña Nieto shërbeu si president i Meksikës për 6 vite, nga 2012 deri në 2018-n.
Guzman, 61 vjeç, po gjykohet nga një juri në Brooklyn që prej nëntorit të vitit të kaluar. Ai u ekstradua nga Meksika për t’u përballur me drejtësinë amerikane. Ai do të gkykohet për akuzat e trafikimit të kokainës, heroinës apo drogave të tjera. Ai konsiderohet lideri i atij që Amerika e quan karteli më i madh i drogës në botë.
Sipas reporterëve në sallën e gjyqit në Brooklyn, Peña Nieto kishte kërkuar 250 milionë dollarë ryshfet, përpara se të pranonte shumën prej 100 milionë dollarësh.
Cifuentes pretendon se dërgesa e shumës është bërë në Mexico City në tetor të vitit 2012. Transferta eshte bere nga një mik i ngushtë i El Chapos. Cifuentes vet, një bos kolumbian droge që e përshkruan veten e tij si “krahu i djathtë” i El Chapos, ka punuar si sekretar i tij. Ai kaloi dy vite në arrati në malet meksikane, për shkak se ishte vënë nën gjuetinë e autoriteteve.
Ai u arrestua në Meksikë në vitin 2013 . U ekstradua më vonë në Shtetet e Bashkuara. Ai pranoi fajësinë për trafikim droge në një pakt me prokurorët.
Peña Nieto nuk ka reaguar ndaj akuzave të fundit, por më herët ka refuzuar çdo akuzë për korrupsion që ka dalë nga gjykimi, që prej nisjes së tij në nëntor.
Ndërkohë, avokati i Guzmanit, Jeffrey Lichtman ka pretenduar se lideri i vërtetë i kartelit të Sinaloas është Ismael “El Mayo” Zambada. Ai i ka shpëtuar përndjekjes duke dhënë ryshfet për “të gjithë” qeverinë meksikane. Përfshire ish-presidentët Peña Nieto dhe Felipe Calderóne.
