1 mln Euro abuzim i bashkisë Sarandë, Gjykata rihap çështjen ndaj Floriana Kokës

Gjykata e Sarandës ka shqyrtuar ditën e sotme ankimimin e Kontrollit të Lartë të Shtetit për mbylljen e hetimeve nga ana e Prokurorisë Sarandë për dosjen ndaj zyrtarëve të Bashkisë Sarandë, ku sipas KLSH abuzimet shkojnë në rreth 1 milionë euro.
Në muajin prill KLSH dorëzoi në Prokurorinë e Sarandës një dosje ku pretendonte se zyrtarët e lartë të Bashkisë Sarandë kishin bërë shkelje ligjore në tendera me një dëm ekonomik rreth 1 milionë euro.
Së bashku me dosjen, KLSH dorëzoi në Prokurori edhe kallëzime penale ndaj kryetares së Bashkisë dhe disa zyrtarëve të tjerë.
Prokuroria nga ana e saj e pushoi çështjen në muajin korrik, me pretendimin se nuk ka gjetur shkelje. Por KLSH në muajin shtator bëri ankimin në Gjykatën e Sarandës ndaj vendimit të Prokurorisë për pushimin e hetimeve.
Gjykata e Sarandës, pas shqyrtimit të ankesës së KLSH ditën e sotme vendosi të detyrojë Prokurorinë e Sarandës për rihapjen e kësaj dosjeje.
Burimi: Shqiptarja.com