Rusia kërkon garanci që NATO të përjashtojë Ukrainën nga anëtarësimi dhe se vendi në luftë të mbetet neutrale në çdo marrëveshje paqeje.
Kjo deklaratë u bë nga një zëvendësministër i Jashtëm rus, i cili tha se vendi në luftë duhet të ruajë status neutral.
“Ne do të kërkojmë që garancitë e hekurta të sigurisë të bëhen pjesë e kësaj marrëveshjeje. Pjesë e këtyre garancive duhet të jetë statusi neutral i Ukrainës, refuzimi i vendeve të NATO-s për ta pranuar atë në aleancë“, tha Alexander Grushko për median ruse Izvestia.
Kjo vjen pasi Presidenti i SHBA Donald Trump ka deklaruar se do të flasë me homologun e tij rus Vladimir Putin të martën , ndërsa bisedimet vazhdojnë për një armëpushim të mundshëm në luftën trevjeçare në Ukrainë.
Duke folur në Air Force One të dielën në mbrëmje, Trump tha:
“Shumë punë është bërë gjatë fundjavës. Ne duam të shohim nëse mund t’i japim fund asaj lufte. Ne do të flasim për tokën. Do të flasim për termocentralet”.
SHBA dhe Ukraina kanë rënë dakord t’i propozojnë Rusisë një armëpushim 30-ditor. Ndërsa Putin tha se ai mbështeste një armëpushim, ai gjithashtu vendosi një listë të kushteve të vështira për arritjen e paqes.
