I dërguari special i SHBA-së për klimën, John Kerry, do të jetë në Pekin nga e diela deri të mërkurën. Kjo është vizita e tretë e një zyrtari të lartë amerikan në Kinë në pak javë.
Udhëtimi i 16-19 korrikut do të jetë i treti i John Kerry-t që nga marrja e pozitës së të dërguarit special për klimën nën Presidentin Joe Biden dhe ai do të bëhet gjithashtu zyrtari i tretë i lartë i administratës që do të shkojë në vend në javët e fundit.
Kerry do të ndjekë gjurmët e Sekretarit të Shtetit Antony Blinken, i cili muajin e kaluar bëri vizitën më të lartë të SHBA në Pekin në gati pesë vjet.
“Kerry synon të angazhohet me PRC për adresimin e krizës klimatike, duke përfshirë respektimin e zbatimit dhe ambicieve në rritje dhe promovimin e një COP28 të suksesshëm,” tha Departamenti i Shtetit në një njoftim për shtyp të martën.
Emiratet e Bashkuara Arabe do të presin bisedimet e OKB-së për klimën COP28 që fillojnë në nëntor, me afro 200 vende pjesëmarrëse që do të mblidhen për të luftuar dhe diskutuar se si të zbutet ngrohja globale dhe ndikimet e saj.
Duke konfirmuar vizitën e Kerryt, Ministria e Ekologjisë dhe Mjedisit e Pekinit tha se të dyja palët “do të kenë një shkëmbim të thellë pikëpamjesh mbi bashkëpunimin në trajtimin e ndryshimeve klimatike”.
Shtetet e Bashkuara dhe Kina janë emetuesit më të mëdhenj në botë të gazeve serrë, si dhe disa nga investitorët më të mëdhenj në botë në energjinë e rinovueshme./Opinion.al
