Zyrtarët e shtetit shqiptar që duan të mbajnë armë me leje mund ta blejnë atë. Vetëm një javë pasi Policia e Shtetit “mblodhi” armët me leje që u ishin dhënë zyrtarëve të shtetit, përfshi deputetët, gjyqtarët, prokurorët e zyrtarët e niveleve të tjera, të gjithë atyre u është krijuar mundësia të blejnë një armë të tillë.
Kjo nuk është një mundësi e nënkuptuar apo diçka subjektive, por një njoftim me shkrim i dërguar nga Policia në adresë të gjyqtarëve e prokurorëve. Duke marrë shkas nga rasti i deputetit Gent Strazimiri, që u shfaq me armë në brez gjatë protestës te Liqeni Artificial, Policia e shtetit dhe Ministria e Brendshme reaguan shpejt.
Në prill, Drejtoria e Përgjithshme e Policisë së Shtetit njoftoi se të gjithë zyrtarët që kishin armë me leje, duhej t’i dorëzonin në komisariatet përkatëse. Njoftimi u adresohej në mënyrë të veçantë gjyqtarëve e prokurorëve. Në njoftim, ndër të tjera, thuhej se “nga të dhënat që disponon Policia e Shtetit, institucionet më problematike në dorëzimin e armëve të zjarrit janë gjyqtarët dhe prokurorët”. “Nga informacionet e marra nga strukturat vendore të Policisë, janë pajisur me armë zjarri 350 zyrtarë për shkak të detyrës (prokurorë, gjyqtarë, deputetë, kryetarë bashkish, ish-kryetarë komunash, Policia Pyjore, Hetimi Tatimor, përmbarues gjyqësorë etj). Deri më datë 31.03.2016 janë grumbulluar 168 armë dhe kanë mbetur pa u grumbulluar 182 armë zjarri (pistoleta)”, thuhej në deklaratën e Policisë në datën 1 prill 2016.
ARMËT NË SHITJE
Por në datën 25 mars, me shkresa zyrtare të Komisariatit nr. 2 dhe 3, të Policisë së kryeqytetit, Policia i është drejtuar Prokurorisë dhe Gjykatës me njoftimin për blerjen e mundshme të armëve.
Në këtë shkresë, pasi u referohet ndryshimeve në ligjin për armët, shefat e komisariateve njoftojnë prokurorët dhe gjyqtarët të paraqiten pranë Komisariatit të Policisë ku banojnë që të pajisen me autorizim për blerje të armëve të llojit pistoletë. Shkresat e lëshuara nga shefat e komisariateve, Arsen Sinamataj dhe Elton Alushi, theksojnë se kategorisë së prokurorëve dhe gjyqtarëve, në bazë të ligjit të armëve, u takon të pajisen me leje për armët. Por ata nuk mund t’i mbajnë armët si deri tani, pasi duhet t’i blejnë ato. “Kërkojmë të paraqiteni pranë komisariatit të merrni autorizimin, më pas të blini pistoletën dhe të paraqiteni përsëri në komisariat për të bërë regjistrimin e saj dhe pajisjen me leje përdorimi”, thuhet në letër.
ÇMIMET E ARMËVE
Sipas burimeve jozyrtare, çmimet e armëve dhe fishekëve që duhet të paguajnë ata zyrtarë që kërkojnë të mbajnë sende të tilla me leje, janë vërtet të kripura. Duke qenë se i gjithë procesi bëhet në funksion të institucionit shtetëror të Policisë, dhe monitorohet nga Policia, çmimet e armëve dhe fishekëve do të jenë me tarifa shtetërore. “Një pistoletë e thjeshtë tregtohet me këto tarifa, 120 mijë lekë të rinj. Çmimet variojnë pastaj deri në 150 mijë lekë të rinj”, kanë thënë burimet. Sipas tyre, ka dyshime se armët në fjalë mund të blihen edhe nga subjekte private që bëjnë tregti të licencuar të armëve të zjarrit./Panorama
