Kryeministri Edi Rama ka hedhur firmën e tij për shkarkimin e kryetarit të Bashkisë së Vaut të Dejës. Kjo masë u mor pas propozimit të ministrit Sandër Lleshaj.
“Zef Hila, haxhiqamilisti i Vaut të Dejës, jo vetëm u shkarkua po do të ndiqet penalisht, për aktin barbar të djegies së shkollës dhe djegies së materialeve zgjedhore! Kush do ta ndjekë shembullin e tij, do të ketë të njëjtin fat dhe do të përballet me drejtësinë”, shkruan Edi Rama në Twitter.
Për sulmin ndaj KZAZ-së janë arrestuar 15 persona, mes tyre edhe vëllai i kryetarit të Bashkisë, 51-vjeçari Alfred Hila.
Ky është rasti i dytë brenda pak ditesh i diegies së KZAZ-ve. Javën e kaluar, mbështetës te opozitës dogjën një nga tre KZAZ-të e Bashkisë Shkodër.
Bashkitë që drejtohen nga të djathtët kanë paralajmëruar se nuk do të lejojnë zhvillimin e votimeve në mjediset që administrohen prej tyre.
Ata i kanë kërkuar Komisionit Qendror të Zgjedhjeve dhe policive vendore që të lirojnë këto mjedise pasi, sipas tyre, Presidenti Meta ka çdekretuar tashmë datën e zgjedhjeve dhe se çdo veprim tjetër është i paligjshëm./ Opinion.al
