Një nga lojtarët më të mirë të Skëndërbeut në sezonet e fundit, Gerhard Progni, i ka dhënë lamtumirën kampionatit shqiptar, duke zgjedhur të luajë në vazhdim për ekipin Zira në Azerbajxhan. Zira është shpallur nënkampione e Azerbajxhanit sezonin që lamë pas dhe do të luajë në Europa League. Kontrata e Prognit do të jetë 1+1 me të drejtë rinovimi. Kjo është eksperienca e parë për 29 vjeçarin në një kampionat të huaj, ndërkohë që fillimet e karrierës i ka nisur të Partizanit dhe për të kaluar më pas te Besa e Kavajës, Dinamo, Flamurtari, Kukësi dhe në dy sezonet e fundit te Skënderbeu si kampion. Progni është largimi i pestë nga Skënderbeu në përfundim të këtij sezoni, pas Mirel Josas, Blendi Shkëmbit, Kristi Vangjelit dhe Renato Arapit. Progni do të përfitojë te Zira plot 300 mijë euro në dy vite plus 30 për qind nëse ka një paraqitje shumë të mirë në vitin e parë. Progni do të gjejë në Azerbajxhan lojtarin e Kombëtares Ansi Agolli që luan për Qarabag, ndërkohë që në të shkuarën kanë qenë të shumtë lojtarë shqiptarë që kanë luajtur në kë vend.
