Eshtë zyrtare. Rinisja e Kategorisë Superiore shtyhet me një javë në kohë. Pra, data 21 janar, e fiksuar për të filluar faza e tretë e kampionatit, ka rënë poshtë tashmë. Më së fundi, të gjitha klubet kanë rënë dakord që kjo gjë të ndodhë, nisur nga kushtet atmosferike të motit dhe vështirësitë jo të pakta që rrjedhin që këndej. Ky duket një lajm i mirë për ato skuadra, që po stërviten në Antalia, sepse mund të qëndrojnë më gjatë atje dhe të përmbushin një minifazë luksi përgatitore. Në njoftimin përkatës të FSHF-së, thuhet:
“Pas një komunikimi të vazhdueshëm me klubet e Kategorisë Superiore, për të arritur një konsensus të plotë, Federata Shqiptare e Futbollit vendosi të shtyjë me një javë fillimin e fazës së 3-të të kampionatit kombëtar, e planifikuar të niste me datë 21 janar. Për shkak të temperaturave të ulëta, kohës së ftohtë dhe mbi të gjitha, pas një akordi dhe konsensusi të plotë me të 10 klubet e Superiores, faza e tretë e kampionatit do të nisë në datën 28 janar 2017, ndërkohë që data 21 do të rikuperohet në një ditë tjetër, e cila do të njoftohet sa më shpejt.”
